Qyrǵyzstannan Altaıǵa qar barystary jetkizildi

ASTANA. KAZINFORM — Qyrǵyzstan Altaı Respýblıkasyndaǵy «Qar barysy» ortalyǵyna úsh barysty tabystady, dep habarlaıdy KABAR.

— Bul sırek kezdesetin ań túrin reıntrodýktsııalaý jáne Altaı-Saıan aımaǵyndaǵy popýlıatsııasyn kúsheıtý jolynda mańyzdy qadam boldy, — dedi Qyrǵyz Respýblıkasynyń Mınıstrler kabınetiniń tóraǵasy — Prezıdent ákimshiliginiń basshysy Adylbek Kasymalıev halyqaralyq ekologııalyq forým barysynda.

Onyń aıtýynsha, barystardy tabystaý tek sımvoldyq qadam emes, sonymen qatar taý ekojúıeleriniń turaqtylyǵyna naqty úles bolyp sanalady. Ol Qyrǵyzstan men Altaı Respýblıkasynyń qar barysyn jáne tabıǵatty qorǵaý salasynda tabysty yntymaqtastyǵy bar ekenin atap ótti.

— 2019 jyldan beri bıoártúrlilikti saqtaý, ekologııalyq soqpaqtar ashý jáne ǵylymı ekspedıtsııalar ótkizýge baǵyttalǵan 10-nan astam birlesken joba júzege asyryldy. Qar barystaryn tabystaý — bizdiń ortaq mıssııamyzdyń jalǵasy, — dedi Kasymalıev.

Sondaı-aq ol 2024 jyly Qyrǵyzstannyń bastamasymen BUU Bas Assambleıasy 23 qazandy Halyqaralyq qar barysy kúni dep jarııalaǵanyn eske saldy. Elde barysty ulttyq sımvol retinde taný týraly prezıdenttiń jarlyǵy bar jáne ony qorǵaýǵa arnalǵan memlekettik strategııa júzege asyrylyp jatyr. Búginde Qyrǵyzstanda qar barysynyń popýlıatsııasy 500-den asady.

Kasymalıev kórshiles elderdiń aýmaqtaryn qamtıtyn transshekaralyq ekologııalyq dálizder qurý arqyly yntymaqtastyqty odan ári tereńdetýge shaqyrdy.

Buǵan deıin Almaty oblysynda qar barysy men sileýsin fototuzaqqa túsip qalǵanyn jazǵan edik.