Qyrǵyzstannan ákelingen jemisterden qaýipti zııankester anyqtaldy
ASTANA. KAZINFORM — Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń Jambyl oblysy boıynsha aýmaqtyq ınspektsııasy elimizdiń aýmaǵyna karantındik zııankestermen zalaldanǵan jemis ónimderin kirgizýge jol bermedi.
«Qordaı» avtomobıl ótkizý beketinde júrgizilgen fıtosanıtarııalyq baqylaý barysynda Qyrǵyz Respýblıkasynan kelgen avtokólik quraldarynan qaýipti karantındik zııankester anyqtaldy.
— Salmaǵy 800 keli bolatyn jańa pisken alhory partııasynan Komstok symyry anyqtaldy. Al jalpy salmaǵy 1 450 kelini quraıtyn shıe jemisinen azııalyq jemis shybyny tabyldy, — delingen AShM habarlamasynda.
Atalǵan karantındik zııankester aýyl sharýashylyǵyna eleýli qaýip tóndiredi. Olar taralǵan jaǵdaıda jemis daqyldaryn zaqymdap, elimizdiń baý-baqsha sharýashylyqtaryna aıtarlyqtaı zalal keltirýi múmkin.
— Fıtosanıtarııalyq baqylaý nátıjesinde zalaldanǵan ónimderdiń barlyǵy qaýipti dep tanylyp, keri qaıtaryldy, — delingen habarlamada.
Quqyq buzýshylarǵa qatysty ákimshiliktik shara qoldanylyp, aıyppul salyndy.
Aıta ketelik Petropavlda Reseıden ákelingen aǵashtan qaýipti karantındik zııankes anyqtalǵan edi.
