Qyrǵyzstanmen kelisim: Talas ózeni arqyly sý berý kólemi ulǵaıtylady

ASTANA. KAZINFORM — Qyrǵyzstanmen Talas ózeni arqyly sý berý kólemin ulǵaıtý týraly kelisim jasaldy. Bul týraly Kazinform saýalyna Sý resýrstary jáne ırrıgatsııa mınıstrliginiń resmı jaýabynda aıtyldy.

— Sý tasqyny kezinde transshekaralyq ózenderde tabıǵı apattar týyndaǵan jaǵdaıda taraptardy shuǵyl habardar etý jóninde kelisim bar. Qyrǵyzstanmen júrgizilgen kelissózder barysynda bizdiń tarap Talas ózeni arqyly sý berý kólemin ulǵaıtý týraly kelisimge keldi. Bul Kırov sý qoımasynan sý jiberýdi retteý jáne sý tasqyny kezeńinde apattyń aldyn alý maqsatynda jasalady, — deıdi vedomstvodan.

Mınıstrlik kórshiles elderden ózen arqyly keletin sýdy negizinen 5 oblys aýyl sharýashylyǵy maqsatynda tutynatynyn málimdedi. 

— Sý paıdalanýdyń negizgi úlesi aýyl sharýashylyǵyna tıesili — bul jalpy alynǵan sýdyń (24,4 km³) shamamen 60%-yn quraıdy (14 km³). Barlyq sý alý mólsherinen turaqty sýarýǵa shamamen 11,6 km³ sý jumsalady. Onyń 97% nemese 11,3 km³ ońtústik 5 oblysqa tıesili. Bul Almaty, Jambyl, Túrkistan, Qyzylorda jáne Jetisý oblysy. Olardaǵy jalpy sýarý alańy 1,61 mln. gektar nemese búkil aýmaqtyń 73%-y (2,3 mln. ga). Qazirgi tańda ońtústik óńirdiń barlyq sý qoımalary sý jınaqtaý rejıminde jumys isteýde, — delingen jaýapta.

BUU-nyń málimetinshe, álem halqynyń 40 protsenti transshekaralyq ózen-kólderdiń mańyna qonystanǵan, onyń tek besten bir bóliginde ǵana sý resýrsyn birlese paıdalaný boıynsha kelisim bar.

Osy oraıda Ortalyq Azııada transshekaralyq ózender máselesi qalaı sheshilip jatqany týraly kólemdi materıal jarııalaǵan edik.