Qyrǵyzstanǵa janar-jaǵarmaı jetkizetin qytaılyq júrgizýshilerdiń kirý tártibi jeńildetildi
ASTANA. KAZINFORM — Qyrǵyzstanda munaı ónimderin memlekettik shekara arqyly avtokólikpen tasymaldaýǵa arnalǵan ýaqytsha arnaıy vızasyz tártip engizildi, dep habarlaıdy Kazinform agenttiginiń Bishkektegi menshikti tilshisi.
Mınıstrler kabıneti Qyrǵyzstanǵa munaı ónimderin avtomobılmen tasymaldaıtyn Qytaı azamattary úshin elge vızasyz kirýdiń ýaqytsha arnaıy tártibin belgileıtin qaýly qabyldady.
Bul shara eldiń ekonomıkalyq qaýipsizdigin nyǵaıtýǵa, halyqty janar-jaǵarmaımen úzdiksiz qamtamasyz etýge jáne ulttyq ekonomıka sýbektilerine memlekettik qoldaý kórsetý maqsatynda qabyldandy.
Qujatqa sáıkes, Qytaı azamattary munaı ónimderin jetkizý úshin Qyrǵyzstan Respýblıkasynyń terrıtorııasynda 5 kún ishinde vızasyz júre alady.
Belgilengen merzim aıaqtalǵannan keıin atalǵan azamattar Qyrǵyzstan aýmaǵynda bolýyn jalǵastyrǵan jaǵdaıda, olarǵa syrtqy kóshi-qon salasyndaǵy jalpy zańnama talaptary qoldanylady.
Buǵan deıin Qyrǵyzstannyń janar-jaǵarmaı materıaldaryn ımporttaýshylar úshin sýbsıdııalardy 2026 jyldyń 31 jeltoqsanyna deıin uzartqany habarlanǵan bolatyn. Sondaı-aq elde Eýro-5 standartyna saı otyn óndirý josparlanyp jatqany týraly jazǵan edik.
Aqzat Baqytjanqyzy
