Qyrǵyzstan halqy Qytaıǵa poıyzben qatynaı alady
ASTANA. KAZINFORM — Qyrǵyzstan halqy Qytaı — Qyrǵyzstan — Ózbekstan temirjoly salynyp bitken soń Qytaıǵa jolaýshylar poıyzymen tikeleı bara alady. Bul týraly Kazinform agenttiginiń Bishkektegi menshikti tilshisi habarlady.
Bul jóninde «Qytaı — Qyrǵyzstan — Ózbekstan» temirjol kompanııasy bas dırektorynyń orynbasary Ulan Qulov «Bırınchı radıo» efırinde málimdedi. Onyń aıtýynsha, temirjol júk jáne jolaýshy tasymalyna arnalyp salynyp jatyr.
— Bul júk jáne jolaýshy tasymaldaıtyn temirjol bolady. Paıdalanýǵa berilgennen keıin qyrǵyzstandyqtar Qytaıǵa poıyzben tikeleı bara alady. Jolaýshylar úshin zamanaýı, jaıly ári júrdek vagondar satyp alýdy josparlap otyrmyz, — dedi ol.
Qazir jolaýshylar poıyzy qatynaıtyn baǵyttar qarastyrylyp jatyr.
Josparǵa sáıkes, temirjol 2031 jyly paıdalanýǵa beriledi. Qyrǵyzstan aýmaǵyndaǵy jol ýchaskesiniń uzyndyǵy 304 shaqyrym bolady. Bul baǵytta 29 tonnel men 50 kópir salynady.
2025 jylǵy sáýirde Qytaı — Qyrǵyzstan — Ózbekstan temirjolyna arnalǵan tonnel qurylysy bastalǵany habarlanǵan edi. Sol jyldyń kúzinde magıstral qurylysy tájirıbelik kezeńge ótti.
Eske salaıyq, buǵan deıin Qytaıda eń uzyn aınalma metro jelisi ashylǵanyn habarlaǵanbyz.
