Qyrǵyzstandyqtar Qazaqstanda joǵary sapaly medıtsınalyq kómek alady
ASTANA. KAZINFORM — Qazaqstan men Qyrǵyzstan medıtsınalyq áriptestikti nyǵaıtýǵa kelisti, dep habarlaıdy Densaýlyq saqtaý mınıstrliginiń baspasóz qyzmeti.
Almatyda Infektsııalyq aýrýlar ulttyq ǵylymı ortalyǵynyń bazasynda Densaýlyq saqtaý mınıstri Aqmaral Álnazarova Qazaqstanǵa jumys saparymen kelgen Qyrǵyz Respýblıkasynyń Mınıstrler Kabıneti tóraǵasynyń orynbasary Edıl Baısalovpen kezdesti.
Mınıstr eki memleket basshylarynyń basshylyǵymen ekijaqty qatynastar dáıekti túrde nyǵaıyp kele jatqanyn, ásirese densaýlyq saqtaý salasyndaǵy yntymaqtastyq qarqyndy damyp kele jatqanyn atap ótti.
Kelissózder barysynda taraptar ınfektsııalyq jáne ınfektsııalyq emes aýrýlarmen kúres salasyndaǵy áriptestikti odan ári keńeıtýge, birlesken bilim berý baǵdarlamalaryn iske asyrýǵa jáne kadrlyq áleýetti damytýǵa qatysty keń aýqymdy máselelerdi talqylady.
Sondaı-aq birlesken satyp alý, dárilik zattardy tirkeý rásimderin jedeldetý, GMP-standarttar boıynsha saraptama almasý máseleleri boıynsha ózara is-qımyl belgilendi. Onkologııalyq qyzmetti damytýǵa erekshe kóńil bólindi.
Mınıstr Qazaqstanda ınfraqurylymdy jańǵyrtý jáne emdeýdiń joǵary tehnologııalyq ádisterin keńeıtý týraly aıtyp berdi.
— Іs-sharanyń qorytyndysy boıynsha taraptar Qyrǵyzstannan kelgen patsıentterdiń Qazaqstandaǵy balalar onkogematologııalyq kómegine qoljetimdiligin keńeıtýge, jylyna 800-den astam patsıentti emdeýge arnalǵan jańa Proton ortalyǵy sheńberinde ózara is-qımyl jasaýǵa, balalar kardıohırýrgııasy jáne eresekter onkologııasy boıynsha halyqaralyq habtar qurý jobalaryna Qyrǵyzstannyń qatysý múmkindigin qarastyrýǵa kelisti. Taraptar turaqty áriptestik tek qujattarǵa ǵana emes, eki eldiń medıtsınalyq qaýymdastyqtary arasyndaǵy ózara qoldaýǵa, bilim almasýǵa jáne kásibı baılanystarǵa negizdeletinin atap ótti, — delingen mınıstrlik taratqan aqparatta.
A. Álnazarova aǵymdaǵy bastamalar aıtarlyqtaı nátıje berip, medıtsınalyq kómektiń sapasyn arttyrýǵa, kadrlyq áleýetti damytýǵa jáne halyqtyń zamanaýı emdeý tehnologııalaryna qoljetimdiligin keńeıtýge yqpal etetinin alǵa tartty.
Іs-sharada qazaqstandyq medıtsına tájirıbesi keńinen usynyldy, patsıentterdi dıagnostıkalaý men emdeýdiń ınnovatsııalyq tehnologııalary tanystyryldy.
Budan buryn Densaýlyq saqtaý mınıstri ushaqta jaǵdaıy nasharlaǵan jolaýshyǵa alǵashqy medıtsınalyq kómek kórsetkeni belgili boldy.