Qyrǵyzstandyq sarapshy: Jańa Konstıtýtsııa — turaqtylyq pen jańǵyrýǵa jol ashady
ASTANA. KAZINFORM — Qyrǵyzstandyq zańger, «Tandem» zańgerler qaýymdastyǵynyń negizin qalaýshy Tattýýbýbý Ergeshbaeva Qazaqstannyń jańa Konstıtýtsııasy jobasyna qatysty taldaýyn usyndy.
Sarapshynyń aıtýynsha, Konstıtýtsııa jobasy memlekettik basqarýda turaqtylyq pen jaýapkershilikke negizdelgen kúshti prezıdenttik basqarý modelin usynady.
— Joba Prezıdenttiń bılik júıesindegi negizgi rólin saqtaı otyryp, konstıtýtsııalyq baqylaý men parlamenttiń qatysý tetikterin kúsheıtýdi kózdeıdi. Bul memlekettik basqarýdy nyǵaıtyp, táýekelderdi azaıtýǵa baǵyttalǵan, — dedi ol.
Sarapshynyń aıtýynsha, beıbit jınalystar ótkizý quqyǵy ulttyq qaýipsizdik pen qoǵamdyq tártipti qorǵaý maqsatynda zańmen shektelýi múmkin.
Zańger Konstıtýtsııa jobasy alǵash ret tsıfrlandyrý dáýiriniń syn-qaterlerin konstıtýtsııalyq deńgeıde eskerip otyrǵanyn jetkizdi.
— Qujatta jeke derekterdi qorǵaý jáne tsıfrlyq ortadaǵy jeke ómirge qol suqpaýshylyq quqyǵy bekitilgen. Bul normalar jalpy sıpatqa ıe jáne aldaǵy ýaqytta salalyq zańnamalar arqyly naqtylaýdy talap etedi, — dedi sarapshy.
Ergeshbaevanyń pikirinshe, jańa Konstıtýtsııa jobasy Prezıdenttiń negizgi rólin saqtap, onyń jeke jaýapkershiligin kúsheıtedi.
Sarapshy eki palataly Parlamentten bas tartyp, biryńǵaı ókildi organ — Quryltaıdy engizý parlament baqylaýyn jáne partııalardyń rólin kúsheıtetinin atap ótti.
Sonymen qatar, Ergeshbaeva Konstıtýtsııalyq Sottyń ókilettikteri aıtarlyqtaı keńeıtilgenine nazar aýdardy.
— Konstıtýtsııalyq Sot bılik tarmaqtary arasyndaǵy tepe-teńdikti qamtamasyz etetin negizgi ınstıtýtqa aınalady. Solaı zań shyǵarýshy jáne atqarýshy bıliktiń konstıtýtsııalyq qaǵıdattardan aýytqýyna jol bermeıtin tetik retinde qyzmet atqarady, — dedi ol.
Tattýýbýbý Ergeshbaevanyń aıtýynsha, Memleket basshysy Qasym-Jomart Toqaevtyń jetekshiligimen daıyndalǵan Konstıtýtsııa jobasy ınstıtýtsıonaldyq turaqtylyq pen egemendikti saqtap, saıası-quqyqtyq jańǵyrýǵa baǵyttalǵan.
Aıta keteıik, buǵan deıin QR Parlamenti Májilisiniń depýtaty Samat Nurtaza jańa Konstıtýtsııaǵa qatysty pikir bildirgen edi.