Qyrǵyzstandyq sarapshy: Qazaqstandaǵy reformalar uzaq merzimdi damýǵa baǵyttalǵan
ASTANA. KAZINFORM – Qazaqstan búginde burynǵydan túbegeıli ózgeshe, jańa memlekettik model qalyptastyryp keledi. Osy sebepti eldegi saıası reformalarǵa tek kórshiles memleketter ǵana emes, alys shetel de erekshe nazar aýdaryp otyr. Bul týraly Jibek Joly News arnasyna bergen suhbatynda qyrǵyzstandyq saıasattanýshy Sheradıl Baktygýlov málimdedi.
Sarapshynyń aıtýynsha, Memleket basshysy Qasym-Jomart Toqaevtyń bastamalaryn tek aǵymdaǵy ózgerister aıasynda ǵana emes, áldeqaıda keń, strategııalyq kontekste qarastyrý qajet. Bul reformalar jedel nátıje kórsetýge emes, eldiń uzaq merzimdi damýyna baǵyttalǵan.
Qyrǵyzstandyq saıasattanýshy Sheradıl Baktygýlovtyń pikirinshe, Qazaqstandaǵy saıası jańǵyrýlar tájirıbeli ári kóregen saıasatkerdiń jeke múddeden góri bolashaq urpaqtyń qamyn birinshi orynǵa qoıatyn kózqarasyn kórsetedi.
- Bul jeke basynyń emes, keleshek qazaqstandyqtardyń múddesin alǵa qoıatyn, kemel saıasatkerdiń úlgisi. Osyndaı fılosofııamen kezinde Sıngapýrda, Birikken Arab Ámirlikterinde reformalar júrgizildi. Eger tarıhqa tereńirek úńilsek, dál osyndaı paıymmen Amerıka Qurama Shtattarynyń negizin qalaýshylar da oı qozǵaǵan, – dedi ol.
Sarapshy Memleket basshysy Qasym-Jomart Toqaevtyń memlekettik basqarýda demokratııalyq qaǵıdattardy júıeli túrde qorǵap kele jatqanyn atap ótti. Onyń aıtýynsha, Qazaqstanda qoǵamdyq mańyzy bar sheshimder azamattardyń tikeleı qatysýymen, sonyń ishinde referendýmdar arqyly qabyldanady. Mundaı tásil saıası daǵdarystar men qoǵamdyq-saıası turaqsyzdyq táýekelderin aıtarlyqtaı tómendetedi.
- Atom elektr stantsııasyn salý nemese konstıtýtsııalyq reforma sekildi aýqymdy máselelerde tek saıası elıtanyń, ıaǵnı bılik resýrstaryn qolyna alǵan belgili bir toptyń ǵana kelisimi jetkiliksiz. Mundaı jaǵdaıda búkil el kóleminde ulttyq konsensýs qajet. Dál osy ustanym – eldiń turaqty ári daǵdaryssyz damýynyń basty kepili, – dedi Sheradıl Baktygýlov.
Aıta keteıik, Prezıdent Konstıtýtsııalyq reforma jónindegi komıssııa qurý týraly Jarlyqqa qol qoıdy.