Qyrǵyzstandaǵy jer silkinisinen 50 shaqty úıge zaqym kelgen

ASTANA. KAZINFORM — Qyrǵyzstannyń Talas oblysy Talas aýdanynda 28 naýryz kúni bolǵan jer silkinisinen 48 úıge zaqym kelgeni anyqtaldy, dep habarlaıdy Kavar.

Qyrǵyz Respýblıkasy Tótenshe jaǵdaılar mınıstrliginiń baspasóz qyzmeti málim etkendeı, tótenshe jaǵdaı bolǵan kúnnen bastap azamattyq qorǵanys komıssııasy zaqym kelgen úılerdi anyqtaý jumystaryna kiristi. Qazirgi ýaqytta 48 úıdiń zaqymdalǵany belgili boldy. Tekseris qorytyndysy boıynsha akt toltyryldy. Komıssııa derekterine sáıkes 48 úıdiń 31-i saqtandyrylǵan kórinedi.

Osylaısha:
• Kopýro-Bazar aýylynda — 26 úı;
• Aral aýylynda — 12 úı;
• Ých-Emchek aýylynda — 2 úı;
• Shýmkar-Ýıa aýylynda — 6 úı;
• Manas aýylynda — 1 úı;
• Kok-Oı aýylynda — 1 úıde zaqymdalý deregi tirkeldi.

Eske salsaq, 28 naýryzda Jambyl oblysynda eki ret jer silkindi. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan. Bul rette jer silkinisiniń oshaǵy Qyrǵyzstan aýmaǵynda ornalasqany habarlandy.

Tabıǵı apat saldarynan Turar Rysqulov aýdany Qaraqystaq aýylyndaǵy mádenıet úıi, Merki aýdandyq aýrýhanasy, Oıtal aýylyndaǵy mektep ǵımaratynyń qabyrǵasynda jaryqshaq paıda bolǵany anyqtaldy.

Al «QazAvtoJol» Jambyl oblysyndaǵy jer silkinisinen keıin jasandy qurylystarǵa esh zaqym kelmegenin atap ótti.

Budan bólek Qazaqstanda bolǵan jer silkinisi Qyrǵyzstanda da sezilgeni aıtyldy.