Qyrǵyzstandaǵy Jalal-Abad qalasynyń ataýy ózgeredi

ASTANA. KAZINFORM – Qyrǵyzstannyń Joǵarǵy Keńes depýtattary Jalal-Abad qalasynyń ataýyn Manas dep ózgertý týraly zań jobasyn úsh oqylymda maquldady, dep habarlaıdy Kazinform tilshisi. 

Mınıstrler kabıneti janyndaǵy Memlekettik qyzmet jáne jergilikti ózin-ózi basqarý isteri agenttiginiń dırektory Qudaıbergen Bazarbaevtyń aıtýynsha, zań jobasy ulttyq ıdeologııany nyǵaıtýǵa, Jalal-Abad qalasyna tarıhı tulǵa, halyq qaharmany, qyrǵyz halqyn túrli basqynshylyqtardan qorǵaýshy uly Manastyń esimin berýge baǵyttalǵan. 

Atyn ózgertýge ketetin shyǵyn shamamen 15 mıllıon somdy quraıdy. 

Qyrǵyz saıasatkeri Felıks Kýlov buǵan deıin Facebook jelisindegi paraqshasynda Jalal-Abad qalasynyń atyn ózgertý jáne oǵan ákimshilik astana mártebesin berý týraly aıtqan bolatyn.

Onyń pikirinshe, Jalal-Abad atyn Manas dep ózgertkennen keıin onyń mártebesin nyǵaıtý úshin belgili bir sharalardy qolǵa alý kerek. 

– Men Nıderland memleketiniń jolymen júrýdi usynamyn. Bul eldiń astanasy – Amsterdam, biraq Gaaga – úkimettiń, parlamenttiń jáne monarhtyń orny. Taǵy bir mysal, úsh astanasy bar Ońtústik Afrıkany aıtýǵa bolady: Pretorııa (ákimshilik), Keıptaýn (zań shyǵarýshy) jáne Blýmfonteın (sot). Nelikten biz osy nusqalardyń birin ustanbaımyz jáne Manas qalasyna ákimshilik astana mártebesin bermeske?! Keıbir mınıstrlikterdi, vedomstvolardy, iri memlekettik korporatsııalardy ońtústikke kóshirýge de bolady. Bul rette Bishkekti de azdap jeńildeter edik, - dep bólisti saıasatker.

Buǵan deıin Qyrǵyzstan eldiń ulttyq tabıǵaty men mádenıetiniń sımvoly mártebesin bekitý úshin barys logotıpin ázirlegen.