Qyrǵyzstandaǵy VI Dúnıejúzilik kóshpendiler oıyndary: negizgi is-sharalar qaıda ótedi
ASTANA. KAZINFORM — VI Dúnıejúzilik kóshpendiler oıyndarynyń ashylý saltanaty 31 tamyzda Bishkektegi jańa stadıonda ótedi. Al oıyndardyń negizgi jarystary men mádenı-ǵylymı is-sharalary 2-6 qyrkúıek kúnderi Ystyqkól oblysynyń Cholpon-Ata qalasy men Qyrchyn shatqalynda uıymdastyrylady. Bul týraly Kazinform agenttiginiń menshikti tilshisi habarlaıdy.
Negizgi is-sharalar baǵdarlamasy:
• Cholpon-Ata qalasyndaǵy ıppodrom — eń tartysty at jarystary men mádenı festıvalder ótetin negizgi alań.
1-5 qyrkúıek kúnderi ótetin sporttyq baǵdarlamada qysqa qashyqtyqqa at jarysy, ıaǵnı qunan jorǵa, qunan báıge jáne jorǵa jarystar uıymdastyrylady.
Mádenı baǵdarlama aıasynda kún saıyn «Kóshpendiler úni» halyqaralyq etno-ánder festıvali ótedi.
· «Kók bóri» arenasy — kók bóri, kókpar, teńge ilý jáne aýdaryspaq sııaqty at sporty jarystary ótetin oryn.
· Choń Sary-Oı aýylyndaǵy Qurmanjan Datqa atyndaǵy Kóshpendiler órkenıeti ortalyǵynda Dúnıejúzilik kóshpendiler oıyndarynyń kórmeleri, art-jobalary men ǵylymı baǵdarlamasy uıymdastyrylady.
3 qyrkúıekte «Kóshpendiler órkenıeti: murasy, paradıgmalary jáne bolashaǵy» atty halyqaralyq ǵylymı-praktıkalyq konferentsııa ótedi.
· «Eýrazııa» qonaqúıi — kóshpeli halyqtardyń zııatkerlik oıyndary ótetin oryn.
Munda kún saıyn toǵyzqumalaq, mangala jáne ovarı oıyndarynan týrnırler bolady.
· Shyńǵys Aıtmatov atyndaǵy «Rýh Ordo» mádenı ortalyǵy
«Kóshpendiler murasy» halyqaralyq etnomádenı festıvaliniń negizgi alańynda jyrshylar, dástúrli mýzykalyq aspap sheberleri men vokalıster baıqaýy ótedi.
· «Gazprom» deneshynyqtyrý-saýyqtyrý kesheni ulttyq kúres túrlerinen jarys ótkizetin basty alań bolady.
1-5 qyrkúıek kúnderi «Kóshpendilerdiń uly kúresi» aıasynda ulttyq kúrestiń birneshe túrinen báseke uıymdastyrylady. Olardyń qatarynda alysh, kýrash, goresh, mongol bóh, qyrǵyz kúróshú, qazaq kúresi, koresh, pahlavanı, hapsaǵaı, gýshtını mıllı kamarbandı jáne gıýlesh bar.
· «Dordoı-Nomad» mádenı-etnografııalyq kesheninde halyqaralyq Nomad Fest mýzykalyq-etnografııalyq festıvali jáne etno-kıim úlgileriniń kórsetilimi men qolónershilerdiń aýqymdy jármeńkesi uıymdastyrylady.
· Qyrchyn shatqaly («Kóchmóndór aalamy» etnoaýyly) — VI Dúnıejúzilik kóshpendiler oıyndarynyń eń iri mádenı-etnografııalyq alańy.
2-5 qyrkúıek kúnderi Qyrchyn shatqalynda «Kóshpendiler álemi: jandy mura» etnoaýylynyń ashylý rásimi ótedi. Baǵdarlamada Etno-bazar, kóshpendilerdiń álemdik ashanasy, etno-ánder baıqaýy, aqyndar aıtysy, óńirler men qalalardyń kontserttik baǵdarlamalary jáne kıiz úıdi jyldam tigý saıysy bar.
Sporttyq baǵdarlamada ulttyq sporttyń san alýan túrinen tartysty básekeler uıymdastyrylady. Sportshylar ordodan, uzaq qashyqtyqqa at jarysynan, sadaq atýdan, búrkitpen ań aýlaýdan synǵa túsedi. Sondaı-aq taıaq tartysh, arqan tartý, sýmo, strongmen jáne ulttyq klassıkalyq kúres boıynsha jarystar ótedi.
Aıta keteıik, Qyrǵyzstanda ótetin VI Dúnıejúzilik kóshpendiler oıyndaryna kirý quny belgili boldy.
31 tamyzda VI Dúnıejúzilik kóshpendiler oıyndarynyń ashylý saltanatyna keletin kórermender úshin «Bishkek Arena» stadıonyna tegin shattl-avtobýstar qatynaıdy. VI Dúnıejúzilik kóshpendiler oıyndarynyń ashylýyna oraı shattl- avtobýstar iske qosylady.
