Qyrǵyzstandaǵy tasqynnan keıin 29 gektar jaıylym sý astynda qaldy
ASTANA. KAZINFORM — Qyrǵyzstannyń Ysyq-Ata aýdanynda jaǵdaı turaqtanǵan, alaıda qaýiptiń áli de saqtalýyna baılanysty óńirde tótenshe jaǵdaı rejımi kúshinde qalady, dep jazady Kabar.
Bul týraly Ysyq-Ata aýdanynyń ákimi Erkeaıym Seıtkazıeva aıtty.
Ákimniń aıtýynsha, oqıǵa bolǵanǵa deıin bir apta buryn Qyrǵyz Respýblıkasynyń TJM-ne qarasty Tótenshe jaǵdaılardy boljaý jáne monıtorıng departamenti Taqyr-Tor kóliniń tasý qaýpi týraly eskertý jasaǵan. Osyǵan oraı, turǵyndardy ýaqytsha kóshirý oryndary daıyndalyp, evakýatsııa jospary bekitilip, tehnıkalyq quraldar anyqtalyp, azamattyq qorǵanys boıynsha oqý-jattyǵýlar ótkizilgen.
Taý kóliniń bógeti jarylǵannan keıin jáne evakýatsııa júrgizilgen soń, buzylǵan joldar men kópirler qalpyna keltirilip, turǵyndar óz úılerine qaıtarylǵan.
Seıtkazıevanyń atap ótkendeı, qazirgi ýaqytta oqıǵa ornynda eki kezekshilik beketi jumysyn jalǵastyryp jatyr. Sonymen qatar, kóldiń jaǵdaıyn baqylaý jáne sý aǵynyn qadaǵalaý maqsatynda Tótenshe jaǵdaılar mınıstrliginiń baqylaý beketi sý qoımasynyń tómengi bóliginde ornalastyrylǵan.
— Mamandardyń málimetinshe, baqylaý jumystary taǵy shamamen 20 kúnge jalǵasady. Tótenshe jaǵdaı rejımi 28 maýsymda engizildi. Eger qaýip seıilse, rejımdi toqtatý týraly sheshim qabyldaımyz. Qazirgi tańda ІІM men TJM qyzmetkerleri, sondaı-aq aıyl ókmotý men aýdandyq ákimdiktiń ókilderi Jaıylma men Almalýý aýyldaryndaǵy kezekshilik beketterde táýlik boıy jumys istep jatyr, — dedi ákim.
Sondaı-aq, onyń sózinshe, tasqyn saldarynan 30 gektardan astam aýyl sharýashylyǵy ýchaskesi zardap shekken.
— Qalpyna keltirý jumystaryn fermerlermen birlese otyryp júrgizip jatyrmyz. Tótenshe jaǵdaılar úshin rezervtik qor bar, osy qordan qajetti kómek kórsetiledi. 29 gektar jaıylym sý astynda qalyp, shamamen 10 gektar arpa egistigine zalal kelgen, — dep qosty Seıtkazıeva.
TJM Tótenshe jaǵdaılardy boljaý jáne monıtorıng departamentiniń dırektory Daýrbek Saqyevtyń málimetinshe, 29 maýsym kúni TJM qyzmetkerleri kóldi tikushaq arqyly taǵy bir ret aerovızýaldy tekseristen ótkizgen. Sonyń nátıjesinde sý deńgeıiniń birshama tómendegeni anyqtalǵan. Qazirgi tańda kóldegi sý kólemi shamamen 300 myń tekshe metr. Buǵan deıin bul kórsetkish 500 myńǵa deıin jetken kórinedi.
— Ulttyq ǵylym akademııasynyń mamandarymen birlesip tekserý júrgizdik. Qazir kólden sekýndyna 3-ten 6 tekshe metrge deıin sý aǵyp jatyr. Qaýip áli de saqtalyp tur, kól áli de toly, qaıta jarylý qaýpin joqqa shyǵarýǵa bolmaıdy. Mınıstrdiń tapsyrmasymen kólge baqylaý jalǵasatyn bolady, — dedi Saqyev.
Eske salaıyq, 2025 jylǵy 27 maýsymda Taqyr-Tor kóliniń jarylýy saldarynan sý tasqyny Almalýý, Taýly Serafımovka jáne Tómengi Serafımovka aýyldaryn basyp ótken. Almalýý aýylynda sý kópirdi shaıyp ketken, sonyń saldarynan jol jabyldy.