Qyrǵyzstandaǵy saılaý: taǵy 393 halyqaralyq baqylaýshy akkredıtteldi
BІShKEK. KAZINFORM – Jogorký Kenesh depýtattaryn merziminen buryn saılaýyna akkredıttelgen halyqaralyq baqylaýshylardyń jalpy sany 770 adamǵa jetti, dep habarlaıdy Kazinform menshikti tilshisi.
Qyrǵyzstan Respýblıkasy Ortalyq saılaý komıssııasynyń málimetinshe, halyqaralyq baqylaýshylar retinde kelesi elderdiń ókilderi akkredıtteldi:
- Fılıppın Respýblıkasynyń saılaý komıssııasy;
- Táýelsiz Memleketter Dostastyǵynyń baqylaýshylar mıssııasy;
- Qyrǵyz Respýblıkasyndaǵy Ońtústik Koreıa elshiligi;
- Qyrǵyz Respýblıkasyndaǵy Túrkııa Respýblıkasynyń elshiligi;
- Qyrǵyz Respýblıkasyndaǵy Qytaı Halyq Respýblıkasynyń elshiligi;
- Iran Islam Respýblıkasynyń elshiligi;
- Qyrǵyz Respýblıkasyndaǵy Germanııa Federatıvtik Respýblıkasynyń elshiligi;
- Qyrǵyz Respýblıkasyndaǵy Mońǵolııa elshiligi;
- Táýelsiz Memleketter Dostastyǵynyń Parlamentaralyq Assambleıasy; • Eýropa Keńesiniń Parlamenttik Assambleıasy;
- Shanhaı yntymaqtastyq uıymy;
- Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosy.
Eske salaıyq, Qyrǵyzstanda Jogorký Kenesh depýtattaryn merziminen buryn saılaý 2025 jylǵy 30 qarasha, jeksenbi kúni ótedi.
Qyrǵyzstan Prezıdenti Sadyr Japarov halyqqa úndeýinde parlamenttik saılaýdyń ótý barysyn jeke ózi baqylaýǵa nıetti ekenin aıtty.
5 qarashada Qyrǵyzstannyń Ortalyq saılaý komıssııasy Qazaqstan Respýblıkasynda qosymsha úsh saılaý ýchaskesin qurý týraly qaýly qabyldady. Olar Almaty, Taraz jáne Shymkent qalalarynda ashylady. Buǵan deıin Astanada (Qyrǵyzstannyń Qazaqstandaǵy Elshiligi), Almatyda (Bas konsýldyq), Atyraý jáne Qaraǵandy qalalarynda ýchaskeler jumys istep turǵan edi.
Aldaǵy merziminen buryn ótetin saılaýǵa 467 kandıdat tirkelgen. Halyqaralyq baıqaýshylar retinde alǵashynda 127 adam, keıin taǵy 251 adam akkredıtteldi.
Sadyr Japarov óz úndeýinde Qyrǵyzstandaǵy jaǵdaıdy destabılızatsııalaýǵa baǵyttalǵan kez kelgen áreket sátsiz bolatynyn málimdedi.
10 qarashada bastalǵan 20 kúndik úgit-nasıhat kezeńi 2025 jylǵy 29 qarasha saǵat 08:00-de aıaqtalady. OSK barlyq saıası úderis qatysýshylaryn zań normalaryn saqtaýǵa shaqyrdy. Saılaý kezinde qoǵamdyq tártipti 10 myńnan astam ishki ister qyzmetkeri qamtamasyz etedi.
22 qarasha kúni Qyrǵyzstanda saılaýdan keıin jappaı tártipsizdik uıymdastyrýǵa daıyndaldy degen kúdikpen 10 adam ustaldy.