Qyrǵyzstandaǵy saılaý: OSK sońǵy saılaý okrýgi boıynsha qorytyndyny qaıta qarady
BІShKEK. KAZINFORM – Qyrǵyzstan Respýblıkasynyń Saılaý jáne referendýmdar ótkizý jónindegi ortalyq komıssııasy 13 aqpandaǵy otyrysynda №13 kóp mandatty saılaý okrýgi boıynsha Jogorký Kenesh depýtattaryn merziminen buryn saılaýdyń qorytyndysyn jaramsyz dep tanydy, dep habarlaıdy Kazinform menshikti tilshisi.
Komıssııanyń málimetinshe, sheshimdi qaıta qaraýǵa Qyrǵyzstan Respýblıkasy Іshki ister mınıstrliginiń qylmystyq isti tergeýi kezinde jańadan anyqtalǵan mán-jaılar negiz boldy.
Atap ótilgendeı, kandıdat Baqyt Sydyqov jaqtastarynyń birneshe saılaý ýchaskelerine mobıldi beınebaqylaý qurylǵylaryn ornatýyna baılanysty saılaý zańnamasyn buzýdyń jeke faktileri anyqtalǵan. Quqyqbuzýshylyqtar jeke sıpatqa ıe boldy. Sydyqovtyń daýys berý qorytyndylary jaramsyz dep tanyldy. №13 kóp mandatty saılaý okrýgi boıynsha Qyrǵyzstan Respýblıkasy Jogorký Keneshine Aıbek Altynbekov, Talant Mamytov jáne Aıgúl Qarabekova saılandy.
Eske sala ketsek, Qyrǵyzstanda bir saılaý okrýgindegi parlament depýtattarynyń saılaýy jaramsyz dep tanyldy.
Keıin Qyrǵyzstan Respýblıkasynyń Saılaý jáne referendýmdar jónindegi ortalyq komıssııasy №13 kóp mandatty saılaý okrýgindegi Jogorký Kenesh (Parlament) depýtattarynyń qaıta saılaý kúnin belgiledi.
Al 9 aqpanda Qyrǵyzstanda sońǵy saılaý okrýginde depýtattardy saılaý boıynsha úgit-nasıhat jumystary bastaldy.
