Qyrǵyzstandaǵy saılaý: ІІM daýys satyp alýǵa qatysty 9 qylmystyq is qozǵady
ASTANA. KAZINFORM – Qyrǵyzstan Іshki ister mınıstrliginiń baspasóz hatshysy Sýltan Makılov brıfıng barysynda saılaý protsesi kezinde tirkelgen 256 zańbuzýshylyq týraly habarlama túskenin málimdedi, dep habarlaıdy Kazinform tilshisi.
Onyń aıtýynsha, 9 derek boıynsha «Daýys satyp alý» babymen qylmystyq is qozǵaldy.
«Bishkekte – 5, Shý oblysynda – 2, Jalal-Abad oblysynda 2 qylmystyq is tirkeldi. 12 adamǵa aıyp taǵyldy. Árbir fakti boıynsha tergeý is-sharalary júrgizilip jatyr», – dedi ol.
Qoǵamdyq qaýipsizdik pen saılaý protsesiniń ashyqtyǵyn qamtamasyz etý úshin 14 myńnan astam ishki ister organdarynyń qyzmetkeri kúsheıtilgen rejımde jumys isteýde.
Sýltan Makılovtyń aıtýynsha, ІІM ortalyq apparatynyń qyzmetter men bólim basshylary Jogorký Kenesh depýtattaryn kezekten tys saılaý kezinde óńirlerge jiberilip, qaýipsizdikti úılestirýdi qadaǵalap otyr.
Eske salaıyq, búgin Qyrǵyzstanda Jogorký Kenesh depýtattaryn kezekten tys saılaý ótip jatyr. Azamattar 30 kópmandatty aýmaqtyq okrýgte daýys berýde. Ár okrýgten 3 depýtat saılanady, olardyń qatarynda keminde bir áıel bolýy tıis. Jalpy 90 depýtat mandat alady.
Shetelde turatyn qyrǵyzstandyqtar úshin 34 eldiń 89 qalasynda 100 daýys berý ýchaskesi jumys istep tur. Qazaqstanda Qyrǵyzstan azamattary daýys bere alatyn ýchaskeler Astanada (QR-daǵy Qyrǵyzstan Elshiligi), Almatyda (Qyrǵyzstannyń Bas konsýldyǵy), Atyraý men Qaraǵandyda ashyldy. Qosymsha úsh ýchaske Almaty, Taraz jáne Shymkent qalalarynda quryldy.
Saǵat 10:00-degi derek boıynsha saılaýshylardyń jalpy kelýi 3,89% (167 072 adam), sheteldegi ýchaskelerde – 1559 adam daýys bergen.
Qyrǵyzstan OSK málimetinshe, saılaýǵa daýys berý quqyǵy bar 4 294 243 azamat tirkelgen: onyń 2 081 514-i er azamat, 2 212 729-y áıelder.
Kezekten tys saılaýǵa 467 kandıdat tirkelip, olardyń jeteýi keıin bas tartqan. Saılaýdy baqylaý úshin 788 halyqaralyq baqylaýshy akkredıttelgen.
Qyrǵyzstan Prezıdenti Sadyr Japarov halyqqa úndeýinde parlament saılaýynyń ótý barysyn jeke ózi baqylaýǵa nıetti ekenin aıtty.
Daýys berý jergilikti ýaqytpen 20:00-de aıaqtalady.