Qyrǵyzstandaǵy saılaý: 4,2 mıllıonnan astam azamat daýys bere alady

ASTANA. KAZINFORM – Qyrǵyzstannyń Ortalyq saılaý jáne referendým ótkizý komıssııasy Jogorký Kenesh depýtattaryn merziminen buryn saılaýǵa qatysatyn azamattardyń túpkilikti tizimin qalyptastyrdy, dep habarlaıdy Kazinform.

OSK málimetinshe, baqylaý tizimine 4 mln 294 myń 243 saılaýshy engizilgen. Onyń ishinde 2 mln 81 myń 514-i – er adam, 2 mln 212 myń 729-y – áıel.

Azamattar ózderiniń saılaýshylar tiziminde bar-joǵyn 1255 nemese 11 qysqa nómirlerine qońyraý shalý arqyly, ýchaskelik saılaý bólimshelerinde, tizme.gov.kg saıtynda nemese jeke kýáliktegi jeke sáıkestendirý nómirin kórsetip, 119 qysqa nómirine SMS joldaý arqyly teksere alady.

Saılaýshylardyń túpkilikti tizimi 2025 jylǵy 25 qarashaǵa deıin 2 492 saılaý ýchaskesine ilinedi.

Eske salaıyq, Qyrǵyzstanda Jogorký Kenesh depýtattaryn merziminen buryn saılaý 2025 jylǵy 30 qarasha, jeksenbi kúni ótedi.

Qyrǵyzstan Prezıdenti Sadyr Japarov halyqqa úndeýinde parlamenttik saılaýdyń ótý barysyn jeke ózi baqylaýǵa nıetti ekenin aıtty.

5 qarashada Qyrǵyzstannyń Ortalyq saılaý komıssııasy Qazaqstan Respýblıkasynda qosymsha úsh saılaý ýchaskesin qurý týraly qaýly qabyldady. Olar Almaty, Taraz jáne Shymkent qalalarynda ashylady. Buǵan deıin Astanada (Qyrǵyzstannyń Qazaqstandaǵy Elshiligi), Almatyda (Bas konsýldyq), Atyraý jáne Qaraǵandy qalalarynda ýchaskeler jumys istep turǵan edi.

Aldaǵy merziminen buryn ótetin saılaýǵa 467 kandıdat tirkelgen. Halyqaralyq baıqaýshylar retinde alǵashynda 127 adam, keıin taǵy 251 adam akkredıtteldi.

Sadyr Japarov óz úndeýinde Qyrǵyzstandaǵy jaǵdaıdy destabılızatsııalaýǵa baǵyttalǵan kez kelgen áreket sátsiz bolatynyn málimdedi.

10 qarashada bastalǵan 20 kúndik úgit-nasıhat kezeńi 2025 jylǵy 29 qarasha saǵat 08:00-de aıaqtalady. OSK barlyq saıası úderis qatysýshylaryn zań normalaryn saqtaýǵa shaqyrdy. Saılaý kezinde qoǵamdyq tártipti 10 myńnan astam ishki ister qyzmetkeri qamtamasyz etedi.

22 qarasha kúni Qyrǵyzstanda saılaýdan keıin jappaı tártipsizdik uıymdastyrýǵa daıyndaldy degen kúdikpen 10 adam ustaldy.