Qyrǵyzstandaǵy prezıdent saılaýyna qansha qarajat jumsalady
ASTANA. KAZINFORM — Qyrǵyzstannyń saılaý jáne referendým ótkizý jónindegi Ortalyq komıssııasy prezıdent saılaýyna ázirlik jasap, ony ótkizýge ketetin shyǵyndar smetasyn bekitti. Bul týraly Kazinform agenttiginiń Bishkektegi menshikti tilshisi habarlaıdy.
Ortalyq saılaý komıssııasynyń dereginshe, prezıdent saılaýyna barlyǵy 1,2 mlrd som (shamamen 6,06 mlrd teńge) jumsalmaq. Onyń 646 mln 560 myń somy (3 mlrd 265 mln teńgeden astam) 2026 jylǵa, al 553 mln 440 myń somy (2 mlrd 796 mln teńgeden astam) 2027 jylǵa bólingen.
Bul qarajattyń ishinde qaıta daýys berýge týra kelgen jaǵdaıda 240 mln som (1,21 mlrd teńgeden astam) shyǵyn engizilgen. Al shetelde júrgen Qyrǵyzstan azamattarynyń saılaý quqyǵyn qamtamasyz etýge 53,2 mln som (286 mln 697 myń teńge) bólindi.
Saılaýdy ótkizýge jumsalatyn shyǵyndarǵa saılaý protsesin uıymdastyrý, aqparattyq jáne tehnıkalyq qoldaý kórsetý, sondaı-aq qajetti qural-jabdyqtarmen qamtamasyz etý kiredi.
Eske sala keteıik, Qyrǵyzstandaǵy kezekti prezıdent saılaýy 2027 jylǵy 27 qańtarǵa belgilendi.
Buǵan deıin Qyrǵyzstan prezıdenti Sadyr Japarovtyń ekinshi merzimge saılaýǵa túsý nıeti bar ekeni habarlanǵan bolatyn.
