Qyrǵyzstandaǵy parlamenttik saılaýǵa qaı partııalar qatysýǵa nıetti
BІShKEK. KAZINFORM – Jogorký Kenesh depýtattarynyń kóp mandatty saılaý okrýgi boıynsha kezekten tys saılaýyna qatysýǵa úsh partııa ótinim berdi, dep habarlaıdy Kazinform menshikti tilshisi.
Qyrǵyz Respýblıkasynyń Saılaý jáne referendým ótkizý jónindegi ortalyq komıssııasyna «Kyrk Ýýz», «Legalaız» jáne «Yntymaq» saıası partııalarynan kezekten tys parlament saılaýyna kandıdattar usynylǵany týraly resmı habarlama kelip tústi.
Zańnamaǵa sáıkes bul saıası partııalar jıyn ótkizip, jasyryn daýys berý arqyly ár okrýgten bir kandıdat usynýy tıis.
- Partııa jıyn kezinde jasyryn daýys berý arqyly ár kóp mandatty saılaý okrýginen bir kandıdatty usynady. Sezd sheshimderi partııanyń qoly jáne mórimen kýálandyrylady jáne OSK-ǵa usynylady. Partııa onyń múshesi emes Qyrǵyz Respýblıkasynyń azamattaryn usyna alady, biraq basqa partııalardyń múshelerin usynýǵa quqyǵy joq. Tizimdi jasaý kezinde genderlik tepe-teńdikti saqtaý kerek: bir jynystaǵy kandıdattardyń úlesi 70 paıyzdan aspaýy kerek, - dep habarlady Qyrǵyz Respýblıkasynyń OSK.
Eske sala ketsek, qyrkúıekte Qyrǵyzstannyń Jogorký Keneshiniń spıkeri Nurlanbek Turǵynbek ýýlý parlament otyrysynda ózin-ózi taratý protsedýrasy bastalǵany týraly aqparatty rastady.
23 qyrkúıekte profıldi komıtet Qyrǵyzstan parlamentin óz erkimen taratý týraly usynysty maquldady.
Al 25 qyrkúıek kúni Qyrǵyzstan Jogorký Keneshiniń otyrysynda parlamentti merziminen buryn taratý týraly sheshim qabyldandy.
Qyrǵyzstan prezıdenti Sadyr Japarov «Qyrǵyz Respýblıkasynyń Jogorký Kenesh depýtattarynyń merziminen buryn saılaýyn taǵaıyndaý týraly» Jarlyqqa qol qoıdy. Merziminen buryn parlament saılaýy jeksenbi, 2025 jyldyń 30 qarashasyna belgilendi.
El prezıdenti halyqqa Joldaýynda parlament saılaýyn jeke ózi baqylaýǵa nıetti ekenin bildirdi.
2025 jylǵy 1 qazanǵa qaraǵandaǵy málimet boıynsha, Qyrǵyzstanda saılaýshylar sany 4 mıllıon 287 myń adamdy qurady.
Buǵan deıin Qyrǵyzstanda depýtattar saılaýy jańa júıe boıynsha ótetinin jazǵan bolatynbyz.