Qyrǵyzstandaǵy parlament saılaýyna qansha adam qatysty
ASTANA. KAZINFORM — 30 qarashada Qyrǵyzstanda Joǵarǵy Keńes (Parlament) depýtattarynyń kezekten tys saılaýy ótti, dep habarlaıdy Kazinform agenttiginiń menshikti tilshisi.
Qyrǵyzstan Respýblıkasynyń Saılaý jáne referendýmdar jónindegi ortalyq komıssııasynyń málimeti boıynsha, saılaýshylardyń 36,9%-y qatysqan. Saılaýshylar tizimine engizilgen 4 294 243 azamattyń 1 584 446-sy daýys berdi.
— 2021 jylmen salystyrǵanda saılaýshylardyń jalpy sany 351 873-ke ulǵaıdy, bul 28,6%-ǵa óskenin bildiredi (2021 jyly 1 232 573 adam daýys berdi), al sheteldegi saılaýshylar sany 16 178-ge ósti, bul 60,7%-ǵa kóbeıgenin bildiredi (2021 jyly 9 825 adam daýys berdi), — dep habarlady saılaý komıssııasy.
Shetelde turatyn jáne shetelde júrgen qyrǵyzstandyqtar 34 eldiń 89 qalasyndaǵy 100 saılaý ýchaskesinde daýys berdi. Eldiń Syrtqy ister mınıstrliginiń málimeti boıynsha, shetelde daýys berýge qatysqan Qyrǵyzstan azamattarynyń jalpy sany 26 066 adamdy qurady (2021 jyly 9 826 bolǵan).
Aıta keteıik, azamattar el boıynsha 30 kópmandatty aýmaqtyq saılaý okrýginde daýys berdi, olardyń árqaısysy Qyrǵyzstan Parlamentine úsh depýtat saılady. Daýys berý nátıjesinde parlamentke barlyǵy 90 adam saılanady.
Qyrǵyzstan Respýblıkasy ІІM baspasóz qyzmetiniń basshysy Sultan Makılovtyń aıtýynsha, keshe mınıstrlikke saılaý zańnamasyn buzý týraly 79 habarlama kelip tústi. Árbir oqıǵa boıynsha aldyn ala tergeý júrgizilip, keıin quqyqtyq baǵa beriledi.
Naýqan kezeńinde Qyrǵyzstan Respýblıkasynyń Ortalyq saılaý komıssııasy saılaý zańnamasyn buzý týraly 269 habarlama berdi, onyń ishinde 124 saılaý naýqany erejelerin buzý, 37 kandıdattardyń bedeline nuqsan keltiretin aqparat taratý, 8 ákimshilik resýrstardy teris paıdalaný, 46 daýys satyp alý múmkindigi jáne 54 basqa da buzýshylyqtar boıynsha tirkeldi.
Sondaı-aq, «daýys satyp alý» baby boıynsha toǵyz qylmystyq is qozǵalyp, 12 azamatqa aıyp taǵylǵany habarlandy.
Budan bólek saılaýdaǵy daýys berý protsesi tolyǵymen avtomattandyrylǵany belgili boldy.
Qyrǵyzstan prezıdenti daýys berý protsesi aıaqtalǵannan keıin BAQ-qa málimdeme jasady.
Joǵarǵy Kenesh depýtattarynyń kezekten tys saılaýyna 467 kandıdat tirkeldi, olardyń jeteýi keıinirek óz kandıdatýralaryn alyp tastady. Daýys berý protsesin 788 halyqaralyq baqylaýshy baqylady.
Saılaýdyń resmı nátıjesi 14 jeltoqsanǵa deıin jarııalanady.