Qyrǵyzstandaǵy parlament saılaýy: 10 myńnan astam polıtsııa tártipti qadaǵalaıdy
ASTANA.KAZINFORM - Aldaǵy kezekten tys parlament saılaýy kezinde qoǵamdyq tártipti saqtaý úshin Qyrǵyzstan quqyq qorǵaý organdarynyń 10 myńnan astam qyzmetkeri jumyldyrylady, dep habarlaıdy Kazinform menshikti tilshisi.
Bul týraly Qyrǵyzstan Respýblıkasy Іshki ister mınıstrliginiń Qoǵamdyq qaýipsizdik qyzmeti bastyǵynyń orynbasary Nurlan Ismaılov «Birinshi radıoda» habarlady.
Onyń aıtýynsha, qazirgi ýaqytta el boıynsha 2492 saılaý ýchaskesinde 5 myńnan astam polıtsııa qyzmetkeri jumys isteıdi. Qoǵamdyq tártip pen azamattardyń qaýipsizdigin qamtamasyz etý, sondaı-aq saılaý kúni jáne onyń aldyndaǵy kúni saılaý zańnamasyn buzýdyń aldyn alý úshin 10 myńnan astam quqyq qorǵaý organynyń qyzmetkeri jumyldyrylady.
Aıta keteıik, Qyrǵyzstandaǵy kezekten tys parlament saılaýy 2025 jyldyń 30 qarashasy, jeksenbige josparlanǵan.
Qyrǵyzstan prezıdenti Sadyr Japarov halyqqa joldaǵan úndeýinde parlament saılaýyn jeke ózi baqylaıtynyn málimdedi.
1 qazandaǵy jaǵdaı boıynsha elde aldaǵy parlament saılaýyna qatysýǵa quqyly 4 287 000 saılaýshy tirkelgen.
5 qarashada Qyrǵyz Respýblıkasynyń Saılaý jáne referendým ótkizý jónindegi ortalyq komıssııasy Almaty, Taraz jáne Shymkent qalalarynda qosymsha úsh saılaý ýchaskesin qurý týraly qaýly qabyldady.
Buǵan deıin Astanada (Qyrǵyz Respýblıkasynyń Qazaqstan Respýblıkasyndaǵy elshiligi), Almatyda (Qyrǵyz Respýblıkasynyń Qazaqstan Respýblıkasyndaǵy Bas konsýldyǵy), Atyraýda jáne Qaraǵandyda saılaý ýchaskeleri ashylǵan bolatyn.
Aldaǵy kezekten tys parlament saılaýyna qatysý úshin 467 kandıdat tirkeldi, al 127 halyqaralyq baqylaýshy akkredıttelgen.
Sadyr Japarov azamattarǵa arnaǵan sózinde Qyrǵyzstandaǵy jaǵdaıdy turaqsyzdandyrý áreketteri sátsizdikke ushyraıtynyn málimdedi.
Saılaý naýqany kezeńi 10 qarashada bastalyp, 20 kúnge sozylady, 2025 jyldyń 29 qarashasynda saǵat 8:00-de aıaqtalady. Qyrǵyz Respýblıkasynyń Ortalyq saılaý komıssııasy saılaý protsesine qatysýshylardyń barlyǵyn zań talaptaryn saqtaýǵa shaqyrdy.
