Qyrǵyzstandaǵy parlament saılaýy: 589 kandıdat usynyldy

ASTANA. KAZINFORM – Qyrǵyzstanda Joǵarǵy Keńestiń (Parlament) kezekten tys saılaýyna kópmandatty okrýgter boıynsha parlamenttik oryndarǵa kandıdat usyný aıaqtaldy, dep habarlaıdy Kazinform agenttiginiń menshikti tilshisi.

Qyrǵyz Respýblıkasynyń Saılaý jáne referendýmdar jónindegi ortalyq komıssııasynyń málimeti boıynsha, barlyǵy 589 kandıdat usynyldy, onyń 365-si – er adam, 224-i – áıel.

Kandıdattardy tirkeý 9 qarashaǵa deıin jalǵasady. Úgit-nasıhat naýqany 10 qarashadan bastalady.

30 qazandaǵy jaǵdaı boıynsha 168 kandıdat tirkeldi, 19 azamat saılaýdan bas tartty, al 7 kandıdat tirkeýden ótpeı qaldy.

Aıta keteıik, 2025 jyldyń qyrkúıeginde Qyrǵyz Respýblıkasynyń Joǵarǵy Keńesi (Parlament) depýtattarynyń bastamashyl toby parlamentti ózin-ózi taratýdy, sodan keıin kezekten tys saılaý ótkizýdi talap etti. 25 qyrkúıekte parlament ózin-ózi merziminen buryn taratý týraly sheshim qabyldady.

Qyrǵyz Respýblıkasy Prezıdentiniń jarlyǵymen Joǵarǵy Keńes (Parlament) depýtattarynyń merziminen buryn saılaýy 2025 jyldyń 30 qarashasyna belgilendi.

Qyrǵyzstan prezıdenti Sadyr Japarov halyqqa joldaýynda parlament saılaýyn jeke baqylaýyna alatynyn málimdedi.

1 qazandaǵy jaǵdaı boıynsha elde 4 287 000 saılaýshy tirkelgen jáne aldaǵy Joǵarǵy Keńes saılaýyna qatysýǵa quqyly.

Buǵan deıin Qyrǵyzstanda parlament saılaýyna kandıdattardy usyný aıaqtalýǵa jaqyn ekenin habarlaǵanbyz.