Qyrǵyzstandaǵy ortasha jalaqy mólsheri anyqtaldy
ASTANA. KAZINFORM — 2025 jyldyń qańtar–shilde aılarynda eseptelgen ortasha aılyq nomınaldy jalaqy 42 522 somdy qurady, dep habarlaıdy Kabar.
Bul týraly búgin ótken brıfıngte Ulttyq statıstıka komıteti tóraǵasynyń orynbasary Baqytbek Shókenov málimdedi.
Onyń aıtýynsha, 2024 jyldyń osy kezeńimen salystyrǵanda jalaqy 20,4%-ǵa artqan.
— Eń joǵary ósim jyljymaıtyn múlikpen jasalatyn operatsııalar, qurylys, densaýlyq saqtaý, halyqqa áleýmettik qyzmet kórsetý, qonaqúı jáne meıramhana qyzmeti, memlekettik basqarý, qorǵanys, áleýmettik saqtandyrý, sondaı-aq qarjy deldaldyǵy men saqtandyrý salalarynda baıqaldy, — dedi Ulttyq statıstıka komıteti tóraǵasynyń orynbasary.
Budan buryn Qyrǵyzstan Mınıstrler kabıneti «Memlekettik zeınetaqy áleýmettik saqtandyrýy týraly» zańǵa sáıkes taǵaıyndalǵan zeınetaqylardy 2025 jylǵy 1 qazannan bastap ındeksteý týraly qaýly qabyldaǵany týraly jazǵanbyz.