Qyrǵyzstandaǵy oqıǵadan keıin eki aýyl arasyndaǵy jol jabyldy

ASTANA. KAZINFORM — Ysyk-Ata aýdanynda ornalasqan «TaQyr-Tor» kóliniń tasýyna baılanysty  Almalýý men Taýly Serafımovka aýyldary arasyndaǵy avtojol ýaqytsha jabyldy, dep jazady Kabar.

Bul týraly Qyrǵyz Respýblıkasynyń Tótenshe jaǵdaılar mınıstrligi habarlady.

Oqıǵa ornynda arnaıy baqylaý beketteri uıymdastyrylǵany atap ótildi. Sý tasqyny toqtap, qaýip seıilgennen keıin tazalaý jumystary bastalady.

— Oqıǵa ornynda Chúı oblysy boıynsha Tótenshe jaǵdaılar mınıstrligi basqarmasynyń jedel toby (5 qyzmetker) kezekshilik etip jatyr. Jalpy 7 tehnıka jumyldyrylǵan: TJM-nen 1 ekskavator men 1 tıegish, № 43 jol paıdalaný mekemesinen 1 tıegish pen 1 manıpýlıator, sý sharýashylyǵy basqarmasynan 1 ekskavator, jergilikti bılikten 2 ekskavator, — dep naqtylady vedomstvo.

Buǵan deıin habarlaǵandaı, Qyrǵyzstannyń Chúı oblysy Ysyk-Ata aýdanynda Taqyr-Tor taý kóliniń bógeti jarylyp, 180 adam evakýatsııalanǵanyn jazǵan edik.

27 maýsymdaǵy málimetterge sáıkes aýdannan 950 adam qaýipsiz jerge kóshirilgen.