Qyrǵyzstandaǵy Kóshpendiler oıyndaryna kórermenderdi 300 avtobýs tegin jetkizedi
ASTANA. KAZINFORM — Kóshpendiler oıyndaryna baratyndarǵa Qyrchyn shatqalyna tegin kólik uıymdastyrylady, dep habarlaıdy Kabar.
Bishkektegi № 2 avtopark aýmaǵynda qala meri Aıbek Djýnýshalıev VI Dúnıejúzilik kóshpendiler oıyndary kezinde jolaýshylar tasymalyna tartylatyn shaǵyn avtobýs júrgizýshilerimen kezdesti.
Qala ákimdiginiń málimetinshe, halyqaralyq sporttyq sharaǵa daıyndyq aıasynda Bishkek merııasynyń Kólik jáne jol-kólik ınfraqurylymy departamenti 300 shaǵyn avtobýsty tartpaq. Olar turǵyndar men el qonaqtaryn Qyrchyn shatqalyna tegin jetkizedi.
Kólik qatynasy úsh negizgi baǵyt boıynsha uıymdastyrylady:
- Baet aýyly — Qyrchyn shatqaly;
- Cholpon-Ata qalasynyń ıppodromy — Qyrchyn shatqaly;
- Jarkynbaev aýyly — Qyrchyn shatqaly.
Sonymen qatar isten shyqqan shaǵyn avtobýstardy jedel aýystyryp, tasymaldyń úzdiksiz jumysyn qamtamasyz etý úshin júrgizýshilerimen birge 15 rezervtik kólik qarastyrylǵan.
Júrgizýshilerge úndeý jasaǵan Aıbek Djýnýshalıev sharalardy kólikpen qamtamasyz etýge qatysý erikti ekenin atap ótti.
— Biz eshkimdi májbúrlemeımiz. Barlyǵy óz erikterińizge baılanysty. Eń bastysy — jumystaryńyzdy sapaly oryndaý, — dedi qala ákimi.
Sondaı-aq Bishkek basshysy júrgizýshilerdiń sharalarǵa qatysýyna baılanysty barlyq shyǵyndy ákimdik óz moınyna alatynyn aıtty.
— Ákimdik tarapynan barlyq shyǵyn óteledi. Ár júrgizýshige qajetti jaǵdaı jasalýy tıis. Atap aıtqanda, turatyn oryn, tamaq jáne kólik isten shyqqan jaǵdaıda tehnıkalyq kómek kórsetiledi, — dedi ákim.
Osyǵan deıin Dúnıejúzilik kóshpendiler oıyndaryna Mońǵolııadan 135 sportshy men jattyqtyrýshy qatysatynyn jazǵanbyz.
Sondaı-aq 2026 jylǵy Dúnıejúzilik kóshpendiler oıyndarynyń talısmany retinde ilbis tańdalǵany habarlanǵan edi. Oǵan Bataı degen esim berildi.
Qyrǵyzstannyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kók bóri men kókpar jarystary jeke-jeke sporttyq dıstsıplına retinde ótkiziledi.
