Qyrǵyzstandaǵy kórmede «Uly dala ańyzdary» tanystyryldy
BІShKEK. KAZINFORM — Bishkektegi Ǵapar Áıtıev atyndaǵy ulttyq beıneleý óneri mýzeıinde qazaqstandyq sýretshiler Ómiráli Ismaılov pen Májıt Báıtenovtiń «Uly dala ańyzdary» atty kartınalarynyń kórmesi ashyldy, dep habarlaıdy Kazinform-nyń Bishkektegi menshikti tilshisi.
Іs-sharanyń resmı ashylýyna Qyrǵyz Respýblıkasynyń Memlekettik hatshysy Arslan Koıchıev, Qazaqstannyń Qyrǵyzstandaǵy Elshiliginiń keńesshi-elshisi Ashat Syzdyqov, shyǵarmashylyq ıntellıgentsııa, qazaq dıasporasynyń ókilderi, jastar qatysty.
Bul — qazaq keskindemesindegi baǵyttardy beıneleıtin eki sheberdiń shyǵarmashylyǵyn biriktirip, qazaq halqynyń tarıhy men mádenıetine, sondaı-aq túrki murasyna arnalǵan kórme.
Kórmege dalanyń tabıǵı sulýlyǵynyń rýhyn, ańyzdar men rámizder atmosferasyn jetkizetin 60-tan astam týyndy qoıylǵan.
QR Kórkemsýret akademııasynyń vıtse-prezıdenti, Qazaqstan Sýretshileri men dızaınerleri odaǵynyń múshesi Ómiráli Ismaılov óz shyǵarmalarynda ómirdiń máni, adam bolmysynyń tabıǵaty, adamnyń dúnıedegi orny máselelerin qozǵaı otyryp, zamanaýı keskindeme men abstraktili ekspressıonızmdi zerttep keledi.
— Búgin biz Bishkekte alǵash ret kórmege shyǵyp otyrmyz. Bul ári qýanyshty, ári tolqytqan kún. Qyrǵyzstandyq áriptester Qazaqstandaǵy sımpozıýmdarǵa jıi qatysady; biz únemi aralasamyz jáne olardyń jumysymen de tanyspyz. Abstraktili mınımalızm men avangard stılinde oryndalǵan meniń kartınalarym kelýshilerge jeldiń kúshi men keń dalanyń tynyshtyǵyn sezinip, dala atmosferasyna enýge múmkindik beredi. Zamanaýı stılde jasalǵan bul týyndylardy jurtshylyq joǵary baǵalaıdy dep senemin, — dedi Ómiráli Ismaılov.
Qazaqstan Kórkemsýret akademııasynyń akademıgi, keskindemeshi, grafık sýretshi, ónertaný kafedrasynyń dotsenti Májıt Báıtenov Qyrǵyzstan astanasyndaǵy murajaıda úlken sýret kórmesin ótkizýdi kópten josparlaǵan bolatyn.
— Kórmege aldyn ala daıyndaldyq. Jumystardyń arasynda eskileri de, jańalary da bar. Kórme jaqsy qoıylǵan dep oılaımyn. Qazaq pen qyrǵyz halyqtarynyń mádenıeti bir-birimen tyǵyz baılanysty. Negizgi taqyryp — qazaq dalasynyń ulylyǵy men tylsym syrlary, — dep bólisti qazaqstandyq sýretshi.
Aıta keteıik, jerlesterimizdiń óner týyndylaryna eresekter ǵana emes, jastar da qyzyǵýshylyq tanytty.
Kórme 31 mamyrǵa deıin ashyq.
Budan buryn Qyrǵyzstan ShYU-nyń 25 jyldyǵyna arnalǵan kúmis monetany aınalymǵa engizgenin jazdyq.
