Qyrǵyzstandaǵy «Qambarata-1» sý elektr stantsııasynyń qurylysy qalaı júrip jatyr

ASTANA.KAZINFORM - Qyrǵyzstanda ornatylǵan qýaty 1860 MVt bolatyn Qambarata-1 sý elektr stantsııasynyń (GES) qurylysy belsendi júrip jatyr, dep habarlaıdy Kazinform agenttiginiń menshikti tilshisi.

Qyrǵyzstan Energetıka mınıstrliginiń málimeti boıynsha, 2025 jyly 2014 jyly ázirlengen tehnıkalyq-ekonomıkalyq negizdemeni jańartý konkýrsy ótkizildi. Qazirgi ýaqytta jeńip alǵan kompanııa jumys júrgizip jatyr. GES bógetiniń túri anyqtaldy. Bul bastamalardy qarjylandyrý úshin Dúnıejúzilik bank buryn bergen 5 mıllıon dollarǵa qosymsha 13,6 mıllıon dollar bóldi.

Sonymen qatar, bank Qyrǵyzstan, Qazaqstan jáne Ózbekstan jobalary úshin negizgi qurylys jumystaryna 1,5 mıllıard dollar bólýdi qarastyryp jatyr. Toǵyz donor «Qambarata-1» sý elektr stantsııasy jobasyn 2,5 mıllıard dollar kóleminde qarjylandyrýǵa daıyn ekenin bildirdi.

Sondaı-aq, jobanyń qorshaǵan ortaǵa áserin baǵalaý aıaqtalǵany, oǵan Dúnıejúzilik bank 18,6 mıllıon dollar bólgeni jarııalandy.

Qazirgi ýaqytta mınıstrlik úkimetaralyq kelisim jobasy boıynsha Qazaqstan men Ózbekstan taraptary usynǵan usynystar men pikirlerdi qarastyryp jatyr. Qyrǵyz Respýblıkasynyń vedomstvoaralyq jumys toby deńgeıinde saraptamalyq kelissózderge daıyndyq júrgizilip jatyr.

Buǵan deıin «Qambarata-1» GES-iniń qurylysyna Qazaqstan qansha úles qosatynyn habarlaǵan edik.