Qyrǵyzstandaǵy bóget jarylǵan aýdanda tótenshe jaǵdaı engizildi

ASTANA. KAZINFORM — Qyrǵyzstannyń TJM Taqyr-Tor taý kólindegi jarylystan keıingi jaǵdaı men aýdandaǵy qalpyna keltirý jumystary týraly aqparat taratty, dep jazady Kabar.

Eske salaıyq, 2025 jylǵy 27 maýsymda Taqyr-Tor kóliniń jarylýy saldarynan sý tasqyny Almalýý, Taýly Serafımovka jáne Tómengi Serafımovka aýyldaryn basyp ótken. Almalýý aýylynda sý kópirdi shaıyp ketken, sonyń saldarynan jol jabyldy. Bishkek—Qoı-Tash—Ysyq-Ata tas jolyna, saıajaı ýchaskelerine, kópirlerlerge, sonymen qosa qarttar men múgedekterge arnalǵan ınternet-úıiniń aýlasyna sý tasqyny qaýpi tóndi.

Osyǵan baılanysty Ysyq-Ata aýdany ákiminiń 2025 jylǵy 28 maýsymdaǵy qaýlysymen aýdan aýmaǵynda tótenshe jaǵdaı rejımi engizildi.

Sondaı-aq, aldyńǵy kúni RES qyzmetkerleri Almalýý aýylynda elektr baǵanalarynyń negizin nyǵaıtý jumystaryn júrgizgeni aıtyldy. Sonyń arqasynda yqtımal qaýip joıyldy.

Búgingi kúni «Taqyr-Tor» kólinen shyǵatyn sýdyń kólemi sekýndyna 2–3 m³ shamasynda ekeni aıtyldy.

Kóldiń jaǵdaıyn baqylaý maqsatynda oqıǵa ornynda Qyrǵyzstan TJM Chúı oblysy boıynsha basqarma bastyǵy, TJM-ge qarasty TJ monıtorıngi jáne boljaý departamentiniń bir qyzmetkeri, sondaı-aq Ulttyq ǵylym akademııasynyń bir ókili bardy. Olar áýeden vızýaldy baqylaý júrgizip jatyr.

Avtojol, kópir jáne sel arnasyn jóndeý boıynsha qalpyna keltirý jumystaryna Tótenshe jaǵdaılar qyzmetiniń 17 qyzmetkeri men 3 tehnıkasy, jol qyzmetteriniń 5 tehnıkasy, jeke merdigerlerdiń 2 ekskavatory, Іshki ister mınıstrliginiń 40 qyzmetkeri jáne jergilikti bılik organdarynyń 19 qyzmetkeri jumyldyrylǵan. Jalpy alǵanda apat saldaryn joıýǵa 76 adam men 12 tehnıka qatysyp jatyr.

Keshe Ysyq-Ata aýdanynda ornalasqan «Taqyr-Tor» kóliniń tasýyna baılanysty Almalýý men Taýly Serafımovka aýyldary arasyndaǵy avtojol ýaqytsha jabylǵany málim boldy.