Qyrǵyzstanda oıynǵa táýeldi balalar qanshalyqty jıi kezdesedi

ASTANA. KAZINFORM — Álemde kvadroberler sııaqty ártúrli aǵymdar men qaýipti oıyndar tanymal bolyp keledi. Pedagog-psıholog, geshtalt-terapevt Polına Fýrsova Qyrǵyzstanda balalardaǵy táýeldilikti qalaı anyqtaýǵa bolatynyn aıtyp berdi, dep habarlaıdy KAVAR.

Onyń aıtýynsha, Qyrǵyzstandaǵy balalar arasynda kvadroberlerdiń belsendiligi nemese «kók kıt» sııaqty qaýipti oıyndarǵa degen qyzyǵýshylyq baıqalmaıdy.

— Ótken jyly bul taqyryp shynymen de talqyǵa tústi, biraq balalar ony qysqa merzimdi trend retinde qabyldap, ol tez ózektiligin joǵaltty, — dep túsindiredi ol.

Psıholog jalpy eldegi balalar arasynda oıynǵa táýeldilik jıi kezdesetinin aıtty. Alaıda, onyń jáne onyń áriptesteriniń tájirıbesinde ata-analar kóbinese táýeldiliktiń saldarymen júginedi. Atap aıtqanda bala tuıyqtalyp, oqýǵa qulyqsyz bolyp, qurdastaryna agressııa tanyta bastaıdy. 

— Jumys barysynda balanyń gadjetterde kóp ýaqyt ótkizetini, qatygez jáne agressıvti kontent jıi kóretini anyqtalady, — deıdi Polına Fýrsova.

Sonymen qatar, Fýrsova jasóspirimder arasynda sportqa bás tigýge qyzyǵýshylyq bar ekenin atap ótti.

— Kámeletke tolmaǵandardyń qumar oıyndarǵa qatysýyna tyıym salynǵanyna qaramastan, onlaın-býkmekerlerge qoljetimdilik ashyq kúıinde qalyp otyr, al jasóspirimder jas shekteýlerin ońaı aınalyp ótedi. Bul úlken másele, óıtkeni mundaı táýeldiliktiń zardaby óte aýyr bolýy múmkin, — dep eskertedi psıholog.

Maman oıynǵa táýeldi jasóspirimderdi qalaı anyqtaýǵa bolatynyn aıtty. 

— Eger balanyń kóńil-kúıi kúrt ózgerse, ol tuıyqtalyp, qarym-qatynastan bas tartyp, ádettegi isterden bas tartsa, mekteptegi úlgerimi tómendese, gadjetke qoljetimdilik shektelgende ashýlansa, uıqysy buzylsa — bul qaýipti sıgnaldar, — deıdi ol.

Qorytyndylaı kele, psıholog balalarmen senimdi qarym-qatynas ornatýǵa, olarmen sóılesýge jáne olardyń ómirine qyzyǵýshylyq tanytýǵa keńes berdi. 

— Kóbinese mundaı ózgeristiń artynda qandaı da bir qajettilik jatýy múmkin: jalǵyzdyq, ýaıymshyldyq, mekteptegi nemese otbasyndaǵy máseleler. Balanyń ekrannan tys ómirge degen shynaıy qyzyǵýshylyǵyn oıatý úshin sport, shyǵarmashylyq, shynaıy qarym-qatynas sııaqty balamalar usyný mańyzdy, — dep túıindedi Fýrsova.

Buǵan deıin zertteýshiler men kongress ókilderi AQSh-ta qumar oıyndarǵa táýeldiliktiń ósýine alańdaýly ekeni habarlandy.