Qyrǵyzstanda zorlyq-zombylyq pen adam saýdasyna qarsy 5200 jedel jelisi ashyldy

ASTANA. KAZINFORM — Qyrǵyzstanda zorlyq-zombylyq pen adam saýdasynan zardap shekkenderge arnalǵan 5200 senim telefony iske qosyldy, dep habarlaıdy Kabar.

Memlekettik áleýmettik tapsyrys aıasynda Eńbek, áleýmettik damý jáne kóshi-qon mınıstrligi jańa áleýmettik jobany — táýlik boıy jumys isteıtin 5200 senim telefonyn iske qosty.

Vedomstvonyń málimetinshe, bul jeli otbasylyq zorlyq-zombylyq pen adam saýdasynan zardap shekkenderge jedel ári sapaly kómek kórsetýge arnalǵan.

5200 nómirine qońyraý shalǵan árbir azamat tegin, anonımdi jáne qupııa túrde kómek ala alady. Senim telefonynda zorlyq-zombylyq, daǵdarystyq jaǵdaılar jáne psıhologııalyq qoldaý kórsetý máseleleri boıynsha arnaıy daıyndyqtan ótken kásibı psıhologtar men keńesshiler jumys isteıdi.

Senim telefony táýligine 24 saǵat, aptasyna 7 kún jumys isteıdi jáne Qyrǵyz Respýblıkasynyń búkil aýmaǵynda barlyq uıaly baılanys operatory arqyly qoljetimdi.

Senim telefonynyń negizgi baǵyttary:

• zorlyq-zombylyq pen qanaýǵa ushyraǵan jandarǵa psıhologııalyq qoldaý kórsetý;

• zardap shekkenderdiń quqyqtaryn qorǵaý sharalary men qoljetimdi qyzmetter týraly aqparat berý;

• qaýipsiz baspana, medıtsınalyq jáne zań kómegine qatysty keńes berý;

• zorlyq-zombylyq qurbandarynyń týystary men kýágerlerine qoldaý kórsetý.

Budan buryn Bishkekte turmystyq zorlyq-zombylyq qurbandaryn qorǵaý úshin elektrondy bilezikter engizilgenin jazǵanbyz.

Sondaı-aq Qyrǵyzstan túnde alkogol satýǵa shekteýler engizýdi josparlap otyr.