Qyrǵyzstanda zorlyq kórsetken adam endi eki aptaǵa qamalýy múmkin

ASTANA. KAZINFORM —  Jogorký Keneshtiń áleýmettik saıasat jónindegi komıteti otbasyndaǵy zorlyq-zombylyqqa qarsy zańnamaǵa ózgerister engizý týraly zań jobasyn alǵashqy oqylymda qarady, dep jazady Kabar.

Bul túzetýler Qyrǵyz Respýblıkasynyń Ákimshilik quqyq buzýshylyqtar kodeksine jáne «Otbasylyq zorlyq-zombylyqtan qorǵaý jáne aldyn alý týraly» zańyna qatysty.

Ádilet mınıstriniń birinshi orynbasary Zarylbek ýýlý Almazbektiń aıtýynsha, zań jobasynda turmystyq zorlyq-zombylyq jaǵdaıynda ákimshilik qamaýǵa alý merzimin 14 táýlikke deıin uzartý usynylady.

— Іs júzinde otbasylyq zorlyq-zombylyq tirkelgen kezde, aqparat ІІM-ge túsedi. Kúndiz ýchaskelik ınspektorlar, túnde patrýldik qyzmet shyǵady. Olar jaǵdaıdy baǵalap, qajet bolǵan jaǵdaıda, qorǵaý orderin beredi. Bul order zorlyq kórsetýshige jábirlenýshige jaqyndaýǵa nemese onymen bir úıde turýǵa belgili bir ýaqytqa tyıym salady, — dedi mınıstr orynbasary.

Talqylaý barysynda depýtat Gúlkan Moldobekova jýyrda bolǵan rezonanstyq oqıǵa — mektep bitirý keshinen keıin kúıeýiniń áıelin atyp óltirý oqıǵasy boıynsha tergeý barysy týraly surady.

ІІM orynbasary Erkebek Ashırhodjaev bul derek boıynsha «Adam óltirý» babymen qylmystyq is qozǵalǵanyn, kúdiktiniń qamaýǵa alynǵanyn, tergeý júrip jatqanyn jáne is materıaldary sotqa jiberiletinin aıtty.

Sondaı-aq, Zarylbek ýýlý Almazbek qorǵaý orderiniń oryndalýyn baqylaýdy kúsheıtý qajet ekenin aıtty.

— Qazirgi ýaqytta bul talapty oryndaýǵa tek ýchaskelik ınspektor jaýapty. Eger bul túzetýler qabyldansa, elektrondy bilezikter men mobıldi qosymshalardy engizý arqyly baqylaý tıimdirek bolar edi, — dedi ol.

Komıtet otyrysy qorytyndysy boıynsha depýtattar zań jobasyn birinshi oqylymda maquldady.

Buǵan deıin Qyrǵyzstanda ulttyq tólqujattar jańaratyny habarlandy.