Qyrǵyzstanda júrgizýshi kýáligine arnalǵan emtıhandy jasandy ıntellekt qabyldaıdy

ASTANA. KAZINFORM – Qyrǵyzstanda 2026 jyldan bastap júrgizýshi kýáligine arnalǵan teorııalyq emtıhandy jasandy ıntellekt qabyldaıdy, dep habarlaıdy Kabar. 

2026 jyldan bastap júrgizýshi kýáligin alý úshin teorııalyq emtıhandy jasandy ıntellekt qabyldaıtyn bolady. Bul týraly Qyrǵyz Respýblıkasynyń Prezıdenti isterin basqarýshy Qanybek Týmanbaev málimdedi.

Onyń aıtýynsha, jańa júıe adamı faktordy tolyqtaı boldyrmaı, barynsha ashyqtyq pen dáldikti qamtamasyz etedi.

— Azamat emtıhanǵa kelip, kompıýter arqyly 5 suraqqa jaýap beredi. Eger durys jaýap berse, júıe avtomatty túrde nátıjesin shyǵaryp, júrgizýshi kýáligi beriledi. Eshqandaı aralasý bolmaıdy, — dedi Týmanbaev.

Aıta ketelik Qyrǵyzstanda taksı júrgizýshileriniń lıtsenzııasyn tekserý keıinge qaldyrylǵan edi.