Qyrǵyzstanda júrgizýshi kýáligine emtıhandy JI qabyldaıdy

  ASTANA.KAZINFORM - Qyrǵyzstanda V jáne S sanatyndaǵy júrgizýshi kýáligin alý merzimi ózgertildi, dep habarlaıdy Kazinform agenttiginiń menshikti tilshisi.

Qyrǵyzstan Respýblıkasy Prezıdentiniń múlikti basqarý departamentiniń málimeti boıynsha, 2026 jyldan bastap barlyq jekemenshik júrgizýshilik mektepter sybaılas jemqorlyqty joıý úshin memlekettiń tolyq baqylaýynda bolady.

V sanatyndaǵy júrgizýshilerdi oqytý 10 aıǵa (480 saǵat), al S sanatyndaǵy oqytý 12 aıǵa sozylady. Oqý baǵdarlamasyna jol qozǵalysy erejeleri, kólik quraldarynyń quramdas bólikteri, kólik quraldaryna tehnıkalyq qyzmet kórsetý, alǵashqy medıtsınalyq kómek, qaýipsiz júrgizý negizderi, quqyqtyq jáne psıhofızıologııalyq qaǵıdattar jáne júrgizýshi etıkasy kiredi.

Emtıhandaǵy suraqtardyń jalpy sany 750-den 2000-ǵa deıin ósti. Teorııalyq emtıhandy jasandy ıntellekt ótkizedi.

-Tunduk platformasy arqyly onlaın rejıminde oqýǵa ótinish bere alasyz. Ótinish berý protsesi, oqý aqysy jáne júrgizýshilik mektepterdiń tizimi týraly tolyq aqparat kelesi aptada beriledi,- dep habarlady Prezıdenttiń múlikti basqarý departamenti.

Sondaı-aq, elde 2026 jyldyń 15 qańtarynan 15 aqpanyna deıin eski nemese turaqty júrgizýshi kýálikterin 10 jyl merzimge jaramdy jańasyna tegin aýystyrýdy usynatyn naýqan bastaldy.

Buǵan deıin elde 2027 jyldyń 31 jeltoqsanyna deıin avtomektepterge kýálik berýge moratorıı engizilgeni habarlanǵan bolatyn.