Qyrǵyzstanda JRVI juqtyrǵandar sany artyp keledi
ASTANA. KAZINFORM — Qyrǵyzstanda JRVI men tumaý juqtyrǵandar sany maýsymdyq kezeńge baılanysty kóbeıip otyr, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Densaýlyq saqtaý mınıstrligine qarasty Aýrýlardyń aldyn alý jáne memlekettik sanıtarııalyq-epıdemıologııalyq qadaǵalaý departamentiniń málimetinshe, 2-8 qarasha aralyǵynda elde JRVI men tumaýdyń 10 900 jaǵdaıy tirkelgen. Bul ótken jyldyń osy kezeńimen salystyrǵanda 1,6 ese kóp.
Aldyńǵy aptamen salystyrǵanda aýrý juqtyrǵandar sany 4,4 paıyz artqan. Naýqastardyń 71,1 paıyzy – 14 jasqa deıingi balalar (7 752 jaǵdaı).
Elde JRVI qozdyrǵyshtarynyń basym bóligin rınovırýstar (47,3 paıyz), paragrıpp vırýstary (22,2 paıyz), adenovırýstar (13,3 paıyz), maýsymdyq koronavırýs (9,9 paıyz), bokavırýstar (5,8 paıyz) jáne basqa vırýstar (1,5 paıyz) quraıdy.
Naýqastar sanynyń artýyna baılanysty Bishkektegi eki medıtsınalyq mekemede qosymsha 350 tósek-oryn ashyldy. Onyń 300-i Respýblıkalyq klınıkalyq ınfektsııalyq aýrýhanada, 50-i Jedel medıtsınalyq járdem qalalyq balalar klınıkalyq aýrýhanasynda daıyndaldy.
Buǵan deıin Batys Qazaqstan oblysynda 1 qazannan beri 9 062 adamnyń jiti respıratorlyq vırýstyq ınfektsııa (JRVI) juqtyrǵany tirkelgenin habarlaǵan bolatynbyz.
