Qyrǵyzstanda JRVI-men syrqattaný deńgeıi ósip keledi

ASTANA. KAZINFORM – Qyrǵyzstanda epıdemıologııalyq maýsymnyń bastalýymen birge jedel respıratorlyq vırýstyq ınfektsııalardyń (JRVI) taralýy artyp keledi, dep habarlaıdy Kazinform tilshisi.

Qyrǵyz Respýblıkasy Densaýlyq saqtaý mınıstrligine qarasty aýrýlardyń aldyn alý jáne memlekettik sanıtarııalyq-epıdemıologııalyq qadaǵalaý departamentiniń derekteri boıynsha, 20-26 qazan aralyǵynda el boıynsha 6 699 jaǵdaı tirkelgen. Bul kórsetkish ótken aptamen salystyrǵanda 13,9%-ǵa joǵary.

Aýrý juqtyrǵandardyń 64,6%-yn 14 jasqa deıingi balalar quraıdy (4 329 jaǵdaı). Olardyń 6,7%-y nemese 452 adam aýrýhanaǵa jatqyzylǵan.

JRVI-men syrqattanýdyń joǵary deńgeıi Bishkek pen Osh qalalarynda, sondaı-aq Naryn jáne Shý oblystarynda baıqalyp otyr.

Eldegi vırýstardyń qurylymyna kelsek, adenovırýs – 34,8%, rınovırýs – 30,4%, paragrıpp vırýstary (I–IV tıpteri) – 17,4%, basqa vırýstar 17,4%-dy quraıdy. Tumaý vırýsy anyqtalǵan joq.

Buǵan deıin Almatyda JRVI juqtyrǵandardyń sany 20 myńǵa jaqyndaǵany habarlanǵan bolatyn.