Qyrǵyzstanda jol erejesin buzǵandarǵa jazany qatańdatý usynyldy
ASTANA.KAZINFORM — Qyrǵyzstanda jol qozǵalysy erejelerin óreskel buzǵany úshin jaýapkershilikti kúsheıtý kózdelgen zań jobasy qoǵamdyq talqylaýǵa shyǵaryldy, dep habarlaıdy Kazinform agenttiginiń Bishkektegi menshikti tilshisi.
Zań jobasyn ázirleýshilerdiń aıtýynsha, sońǵy jyldary jol-kólik oqıǵalarynyń deńgeıi joǵary kúıinde qalyp otyr. Qoldanystaǵy ákimshilik sharalarǵa qaramastan, qaıtalanatyn quqyq buzýshylyqtar azaımaı otyr. Bul jol qaýipsizdigi salasyndaǵy keıbir aldyn alý tetikteriniń tıimdiligi jetkiliksiz ekenin kórsetedi.
Zań jobasyna sáıkes mynadaı jazalar usynylǵan:
Saǵatyna 20–40 shaqyrymǵa jyldamdyqty asyrý — 5 myń som aıyppul;
Saǵatyna 40–60 shaqyrymǵa asyrý — 15 myń som aıyppul, al 6 aı ishinde qaıtalansa — 15 myń som aıyppul jáne 6 aıǵa júrgizýshi kýáliginen aıyrý;
Saǵatyna 60 shaqyrymnan artyq asyrý — 20 myń som aıyppul jáne 6 aıǵa júrgizýshi kýáliginen aıyrý;
Іshki ister, kólik nemese keden organdary qyzmetkerleriniń toqtaý týraly talabyn oryndamaý — 7,5 myń som aıyppul, al bir jyl ishinde qaıtalansa — 20 myń som aıyppul jáne 6 aıǵa júrgizýshi kýáliginen aıyrý;
Qos tutas jolaq syzyǵyn kesip ótý — 5 myń som aıyppul;
Qoǵamdyq kólik jolaǵynda toqtaý nemese kólik qoıý, jaıaý júrginshiler ótkelinen ótý erejelerin buzý, jaıaý júrginshilerge jol bermeý, kólik júrgizý kezinde telefon paıdalaný nemese jolǵa qoqys tastaý — 5 myń som aıyppul;
Bir nemese qos tutas syzyq arqyly qarsy baǵytqa shyǵý — 15 myń som aıyppul jáne 6 aıǵa júrgizýshi kýáliginen aıyrý;
Baǵdarshamnyń tyıym salatyn belgisine ótý — 20 myń som aıyppul jáne 6 aıǵa júrgizýshi kýáliginen aıyrý;
Balalardy arnaıy avtokreslosyz tasymaldaý — 2 myń som aıyppul;
Motoshlem nemese qaýipsizdik beldigin paıdalaný talaptaryn buzý — 3 myń som aıyppul;
Memlekettik nómirsiz nemese nómiri jasyrylǵan kólikti basqarý — 15 myń som aıyppul, al 6 aı ishinde qaıtalansa — 6 aıǵa júrgizýshi kýáliginen aıyrý;
Qıylystardan ótý erejelerin buzý, trotýarmen nemese jaıaý jáne velosıped joldarymen júrý — 10 myń som aıyppul;
Joldy, kósheni, temirjol ótkelin nemese basqa da jol ınfraqurylymyn búldirý — jeke tulǵalarǵa 10 myń som, zańdy tulǵalarǵa 27 myń som aıyppul.
Buǵan deıin Qyrǵyzstanda mas kúıinde kólik júrgizgenderge qatysty jazany qatańdatý máselesi kóterilgen bolatyn.
