Qyrǵyzstanda jol apatynan zardap shekken qazaqstandyq elge jetkizildi

ASTANA. KAZINFORM — Qyrǵyz Respýblıkasynyń Osh oblysynda Qazaqstan azamaty jol-kólik apatynan zardap shekti, dep habarlaıdy agenttiktiń menshikti tilshisi.

Qazaqstan Respýblıkasynyń Qyrǵyzstandaǵy Bas konsýldyǵynyń málimetinshe, 2025 jylǵy 27 tamyzda Nurtazına A.A. esimdi qazaqstandyq áıel jol apatynan aýyr jaraqat alyp, Osh qalalyq klınıkalyq aýrýhanasyna jetkizilgen. Onda oǵan shuǵyl medıtsınalyq kómek kórsetildi.

— Týystarynyń ótinishi boıynsha QR Bas konsýldyǵy shuǵyl túrde máseleni sheshýge kiristi. QR Densaýlyq saqtaý mınıstrligimen jáne jergilikti densaýlyq saqtaý organdarymen birlesip, 5 qyrkúıekte Osh qalasyna sanıtarlyq avıatsııa ushaǵy jiberildi. Sol kúni otandasymyz Qazaqstanǵa sátti jetkizilip, ári qaraıǵy em-domyn jalǵastyrýda, — delingen habarlamada.

Buǵan deıin Oralda polıtseıden qashqan turǵyn jol apatyn jasap, júrgizýshini mert qyldy.