Qyrǵyzstanda Jogorký Keneshtiń eks-depýtatynyń uly ustaldy
Qyrǵyzstanda Ulttyq qaýipsizdik organdary Qamshy Kólbaev uıymdasqan qylmystyq tobyn qarjylandyrǵany jáne tabysyn zańdastyrǵany úshin QR Parlamentiniń burynǵy depýtatynyń ulyn ustady, dep habarlaıdy Kazinform agenttiginiń tilshisi QR UQMK baspasóz qyzmetine silteme jasap.
Vedomstvo deregi boıynsha, 2023 jyldyń 21 qarashasynda arnaıy qyzmet QR JK eks-depýtaty Borıs Sannyń balasy – Aleksandr Sandy ustady. Oǵan tergelip jatqan qylmystyq is aıasynda Qamshy Kólbaev UQT músheleriniń qylmystyq jolmen tapqan tabysyn zańdastyrǵany jáne jeke kásipkerlik nysandaryn zańdastyrǵany úshin qylmysqa sybaılas boldy degen aıyp taǵylyp, 2024 jyldyń 4 qańtaryna deıin tergeý ızolıatoryna qamaldy.
Jedel-tergeý sharalary aıasynda astanalyq «Madına» bazarynyń negizin qalaýshy, «Ittıpak» uıǵyr dıasporasynyń kóshbasshysy Tursyntaı Salımovke tıesili bolǵan burynǵy balabaqsha, qazirgi «Roıal Sport» saýyqtyrý kesheni aýmaǵynda premıým sanattaǵy kópqabatty turǵynúı salý josparlanǵany anyqtaldy. Qurylysty bastaý sharttarynyń biri retinde qurylys kompanııasy kepildikke qymbat páter berýi tıis bolǵan. Biraq ruqsat qujattardy alý múmkin bolmaǵandyqtan kelisimsharttyń kúshi joıyldy.
Bishkektegi «Madına» bazarynyń negizin qalaýshynyń uly Ilshat Salımov 2020 jyldyń qańtarynda Aleksandr San jáne Qamshy Kólbaevpen birge qurylys kompanııasyna tıesili premıým sanattaǵy «Magnat» turǵynúı keshenindegi quny 300 000 AQSh dollary bolatyn, aýqymy 300 sharshy metrlik páterdi qysym kórsetip, kúsh qoldaný arqyly zańsyz jolmen ıemdenip alǵan. Keıinirek bul páterdi Qamshy Kólbaev Sholpan Atada saýda ortalyǵyn salý maqsatynda ǵımaraty bar jer telimine (burynǵy Borıs Sanǵa tıesili «Zodıak» kazınosy) aýystyrǵan.
Joǵaryda atalǵan páter Qamshy Kólbaev UQT múshelerin qarjylandyrýmen jáne olardyń qylmystyq jolmen tapqan tabysyn zańdastyrýmen aınalysqan QR JK eks-depýtaty Borıs Sannyń uly – Aleksandr Sannyń atyna rásimdelgen.
Sonymen qatar San otbasy jalpy quny 80 mln AQSh dollary bolatyn 59 baǵaly jyljymaıtyn múlikke, onyń ishinde kommertsııalyq maqsattaǵy nysandarǵa ıelik etetini anyqtaldy.
Qazirgi ýaqytta Qamshy Kólbaev uıymdasqan tobyna baılanysy bar basqa da tulǵalardy, sondaı-aq qylmystyq jolmen ıelengen aktıvterdi tabý úshin jedel-tergeý amaldary júrip jatyr.
Buǵan deıin Qyrǵyzstanda atyshýly qylmystyq «avtorıtet» Qamshy Kólbaevty (Qamshybek Asanbek) ustaýǵa baǵyttalǵan arnaıy operatsııa júrgizilip, atys kezinde ol qarsylyq kórsetip, UQK arnaıy jasaǵynyń kúshimen kózi joıylǵanyn habarlaǵan bolatynbyz.
Sondaı-aq Qyrǵyzstanda qylmystyq is aıasynda júrgizilgen jedel-izdestirý sharasynyń barysynda Kólbaevqa tıesili bolǵan, quny 500 myń AQSh dollary bolatyn asyltuqymdy jylqylar tárkilendi.
Memlekettik keden qyzmetiniń 50-ge jýyq qyzmetkeri marqum bolǵan qylmys áleminiń serkesi Qamshy Kólbaevpen tyǵyz baılanysta bolǵany úshin jumystan shyǵaryldy.
Qamshy Kólbaevtyń uıymdasqan qylmystyq toby Qyrǵyzstannyń burynǵy premer-mınıstri Sapar Isakovqa syılaǵan lıýks sanatyndaǵy brondy avtokólik te tárkilengenin eske sala keteıik.
