Qyrǵyzstanda Jogorký Keneshke daýys berýshilerdiń túpkilikti tizimi jarııalandy

ASTANA. KAZINFORM — Ortalyq saılaý komıssııasy Jogorký Kenesh depýtattaryn merziminen buryn saılaý úshin daýys berýshilerdiń qorytyndy tizimin memlekettik «Tızme» portalyna jarııa etti, dep habarlaıdy Kabar.

Ortalyq saılaý komıtetiniń málimetinshe, 2025 jyldyń 30 qarashasyna taǵaıyndalǵan merziminen buryn ótetin parlamenttik saılaýǵa arnalǵan daýys berýshilerdiń sońǵy tizimderin Prezıdent isteri basqarmasyna qarasty «Kyzmat» memlekettik mekemesi halyqtyń Biryńǵaı memlekettik tizilimindegi derekter negizinde jasaǵan.

Qorytyndy tizimder 2025 jyldyń 25 qarashasyna deıin 2492 saılaý ýchaskesinde qaǵaz túrinde ilinedi.

Tizimdegi saılaýshylar sany — 4 294 243 adam, onyń ishinde:

Jynysy boıynsha:

• erler — 2 081 514 (48,47%)

• áıelder — 2 212 729 (51,52%)

Jasy boıynsha:

• 18 jastaǵylar — 104 693 (2,44%)

• 19–35 jas — 1 707 851 (39,77%)

• 36–45 jas — 923 975 (21,52%)

• 46–55 jas — 650 851 (15,16%)

• 56–65 jas — 528 771 (12,31%)

• 66 jastan joǵary — 378 102 (8,80%)

OSK saılaýshylarǵa ózderin tizimnen tekserý múmkin ekenin eske salady:

• 1255 nemese 119 qysqa nómirlerine qońyraý shalý arqyly;

• óz saılaý ýchaskesinde;

• tizme.gov.kg saıtynda;

• nemese 119 nómirine tólqujattaǵy jeke sáıkestendirý nómirdi (JSN) kórsetip SMS jiberý arqyly.

SMS jiberý men qońyraý shalý tegin.

Budan buryn habarlanǵandaı, Qyrǵyzstanda saılaýdan keıin jappaı tártipsizdik uıymdastyrmaq bolǵan 10 kúdikti ustalǵany anyqtaldy.