Qyrǵyzstanda jynystyq zorlyq-zombylyq úshin jaza engizýdi usyndy

BІShKEK. KAZINFORM — Qyrǵyzstan seksýaldyq zorlyq-zombylyq úshin jazany qarastyratyn zańnamalyq túzetýler engizýge bastamashy boldy, dep habarlaıdy Kazinform menshikti tilshisi. 

Tıisti zań jobasy qoǵamdyq talqylaýǵa shyǵaryldy. 

Atap ótilgendeı, sońǵy jyldary elde qoǵamdyq oryndarda jynystyq zorlyq-zombylyq kórsetýge jáne tulǵaaralyq qarym-qatynasqa qatysty azamattardan aryz-shaǵymdar tirkelip otyr. Qoldanystaǵy zańnamada «qýdalaý» termıniniń jekelegen jáne naqty anyqtamasy joq, bul kinálilerdi zańsyz áreketteri úshin jaýapkershilikke tartýdy qıyndatady nemese kináliler laıyqsyz jeńil jazalar alady.

Qujatqa sáıkes, jeke tulǵalarǵa 200 eseptik kórsetkish (20 myń som nemese 120 myń teńgeden astam) aıyppul salý nemese birinshi ret qýdalaý áreketi úshin úsh kúnnen jeti táýlikke deıin qamaýǵa alýdy engizý usynylady. Seksýaldyq minez-qulyqqa seksýaldy sıpattaǵy sózderdi paıdalaný nemese eske salý, jynys múshelerin ashý, qajetsiz tıip ketý, qysý, sıpaý, shymshý, sondaı-aq ádepsiz fotosýretter, beıneler nemese aýdıo materıaldardy, sonyń ishinde messendjerler jáne/nemese ınternet arqyly jiberý jatqyzylady.

Qoǵamdyq oryndarda basqa adamnyń kelisiminsiz bir jyl ishinde qaıtalap jasalǵan, jábirlenýshini qorqytatyn, dushpandyq, qorlaıtyn jaǵdaı týǵyzatyn jynystyq sıpattaǵy áreketter úshin úsh jyldan bes jylǵa deıingi merzimge bas bostandyǵynan aıyrý túrindegi jaza engiziledi.

Buǵan deıin Qyrǵyz Respýblıkasynyń Prezıdent ákimshiligi áıelder men balalarǵa zorlyq-zombylyq jasap, óltirgenderge qatysty ólim jazasyn engizýdi kózdeıtin Konstıtýtsııaǵa túzetýler engizý týraly bastama kótergenin jazǵan bolatynbyz.