Qyrǵyzstanda jylytý jáne ystyq sýdyń baǵasyn kóterý máselesi qarastyrylyp jatyr

ASTANA. KAZINFORM –  Qyrǵyzstan úkimeti bıylǵy 1 maýsymnan bastap jylytý jáne ystyq sý tarıfterin 25 paıyzǵa kóterýdi josparlap otyr, dep habarlaıdy Kazinform agenttiginiń menshikti tilshisi.

2030 jylǵa deıingi orta merzimdi tarıftik saıasat týraly qaýly qoǵamdyq talqylaýǵa shyǵaryldy.

Qujatqa sáıkes, 2025 jyldyń 1 maýsymynan bastap turǵyn úı kólemi 80 sharshy metrge deıingi halyq úshin jylytý men ystyq sý tarıfi 25%-ǵa, 2026 jyldyń 1 maýsymynan bastap — 50%-ǵa, 2027 jyldyń 1 maýsymynan bastap — 75%-ǵa artady. Al 2028–2030 jyldary tarıfter ózindik qun deńgeıinde belgilenetin bolady.

Al turǵyn úı kólemi 80 sharshy metrden asatyn halyqqa, sondaı-aq ónerkásiptik, bıýdjettik jáne basqa da tutynýshylar úshin jylytý men ystyq sý tarıfteri tolyq ózindik qun deńgeıinde belgilenedi.

Elde jylý energııasyna qoldanystaǵy tarıfter tutynýshylar úshin ózindik qunnan tómen deńgeıde belgilenetini atap ótildi. Bul jaǵdaı jyl saıynǵy qarjylyq tapshylyqqa alyp kelip, jylýmen qamtý salasyndaǵy jabdyqtardyń tozý deńgeıiniń artýyna sebep bolyp otyr.

Buǵan deıin Qyrǵyzstanda 2030 jylǵa deıin jyl saıyn elektr energııasy tarıfin 20%-ǵa kóterý usynylǵany habarlanǵan bolatyn.

Aıta ketelik Qyrǵyzstan prezıdenti nıkab pen paranja kııýge qatysty pikir bildirgen edi.