Qyrǵyzstanda jyl basynan beri ınflıatsııa 6,7%-ǵa jetti
ASTANA. KAZINFORM – Qyrǵyzstanda bıylǵy jeti aıda tutyný baǵalary men tarıfter 6,7%-ǵa ósti, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Ulttyq statıstıka komıtetiniń málimetinshe, azyq-túlik ónimderi men alkogolsiz sýsyndardyń baǵasy 5,9%-ǵa, alkogoldi sýsyndar men temeki ónimderi 7,1%-ǵa, azyq-túlikke jatpaıtyn taýarlar 5,1%-ǵa, al halyqqa kórsetiletin qyzmetter tarıfteri 10,1%-ǵa qymbattaǵan.
Baǵanyń ósýi eldiń barlyq óńirinde tirkeldi. Eń joǵary qymbattaý Osh oblysynda baıqaldy.
Munda azyq-túlik ónimderi men alkogolsiz sýsyndardyń baǵasy 11,9%-ǵa, alkogoldi sýsyndar men temeki ónimderi 21,4%-ǵa, azyq-túlikke jatpaıtyn taýarlar 10,6%-ǵa, al halyqqa kórsetiletin qyzmetter tarıfteri 23,8%-ǵa ósken.
Buǵan deıin Qyrǵyzstanda AI-95 markaly benzın baǵasyn memlekettik retteý toqtatylǵany habarlanǵan bolatyn.
Sondaı-aq elde janar-jaǵarmaı baǵasynyń ósýin tejeý maqsatynda benzın men dızel otynyna salynatyn salyqty ýaqytsha tómendetý usynylǵany týraly jazǵan bolatynbyz.
Qyrǵyzstanda janarmaı baǵasynyń ósýine ne sebep bolǵany týraly materıaldy oqyńyz.
