Qyrǵyzstanda jergilikti keńeshter depýtattyǵyna úmitkerlerdiń árqaısysy tekseriledi

BІShKEK. KAZINFORM – Qyrǵyzstan Ulttyq qaýipsizdik memlekettik komıtetiniń tóraǵasy Qamchybek Tashıev jergilikti keńeshter depýtattyǵyna úmitkerlerdiń árqaısysynyń qylmysqa jáne sybaılas jemqorlyqqa qatysy bar-joǵyn muqııat tekserýdi tapsyrdy.

Arnaıy qyzmet basshysy Batken oblysynda shekarashylarmen kezdesýde memlekettik organdardyń saılaý barysyna aralaspaýy kerektigin basa aıtty.

«Biz memleketti ádil basqarýymyz kerek. Memlekettik organdar, onyń ishinde áskerı qyzmetkerler saılaýǵa aralaspaýy kerek. Burynǵydaı bolmaıdy. Árkim óziniń qalaǵan kandıdatyn qysymsyz tańdaýy tıis. Biz depýtattardyń memleketke qyzmet etýi úshin taza bolýyn qamtamasyz etýge tyrysamyz. Biz jergilikti keńeshterdi, parlamentti ádiletsiz saılanǵan, sondaı-aq qylmys, sybaılas jemqorlyq jáne buryn zań buzǵan depýtattardan tazarttyq. Qazirgi depýtattyqqa úmitkerler búginnen bastap oılanýy kerek. Kandıdattardyń árqaısysyn tekserip, ózi nemese týystary qylmysqa, uıymdasqan qylmystyq toptarǵa jáne sybaılas jemqorlyqqa qatysy bar adamdardy tizimnen shyǵarý qajet. Daýystardy satyp alǵandar zańǵa sáıkes qatań jazaǵa tartylady. Memleketti tazartý saılaýdan bastalýy kerek», - dep málimdedi Q.Tashıev.

Eske sala ketsek, 2024 jyldyń 17 qarashasynda Qyrǵyzstanda jergilikti keńeshterdiń, sondaı-aq Bishkek pen Osh qalalary depýtattarynyń saılaýy ótedi. OSK málimetinshe, 39 saıası partııa 33 qalalyq keńesh depýtattyǵyna 188 kandıdattyń tizimin usynǵan.