Qyrǵyzstanda jergilikti keńes saılaýynda qashyqtan daýys berý júıesi qoldanylady
ASTANA. KAZINFORM - Qyrǵyzstanda 2024 jyldyń 17 qarashasynda ótetin jergilikti keńester depýtattaryn saılaý kezinde qashyqtan daýys berý júıesi qoldanylady.
Qyrǵyz Respýblıkasy Prezıdentiniń «Qyrǵyz Respýblıkasynyń jergilikti keneshterin taratý jáne Qyrǵyz Respýblıkasynyń jergilikti keneshteri depýtattaryn saılaýdy taǵaıyndaý týraly» 2024 jylǵy 6 qyrkúıektegi jarlyǵyna sáıkes Qyrǵyz Respýblıkasynyń saılaý jáne referendýmdar ótkizý jónindegi ortalyq komıssııasyna qashyqtan daýys berý júıesin qoldaný tapsyryldy.
Qashyqtan daýys berý saılaýshylar tizimine engizilgen, biraq turaqty tirkelgen jeri boıynsha saılaý ýchaskesinde daýys berýge múmkindigi joq jáne qashyqtan daýys berýge qatysý týraly ótinish bergen azamattardyń belsendi saılaý quqyǵyn iske asyrýdy qamtamasyz etýge arnalǵan.
Ony ótkizý úshin Bishkek, Osh, Qarakól, Jalal-Abad, Naryn, Talas, Batken qalalarynda saılaý ýchaskeleri qurylatyn bolady. Qashyqtan daýys berýge qatysýshylar tizimine engizilgen saılaýshy tek qashyqtan daýys berý formaty boıynsha daýys berýge quqyly.
Qashyqtan daýys berýge qatysqysy keletin azamattar 2024 jylǵy 1 qarashaǵa deıin daýys berý kúni nemese elektrondy «saılaýshylar kabıneti» arqyly ýaqytsha ornalasqan jeri boıynsha aýmaqtyq saılaý komıssııasyna ótinish berýi qajet (voter-cabinet.srs.kg) «Tızme» saılaýshylar portalynda (tizme.gov.kg).
Esterińizge sala keteıik, Qyrǵyzstanda 17 qarashada 249 jergilikti Kenesh, sondaı-aq Bishkek jáne Osh qalalarynyń depýtattaryn saılaý ótedi. Sondaı-aq, «Ata-Jurt» saıası partııasy jergilikti keneshterdiń saılaýyna qatyspaıtyny habarlandy.
