Qyrǵyzstanda jergilikti keńes depýtattaryn saılaý: Sadyr Japarov halqyna úndeý jasady

ASTANA.KAZINFORM - Qyrǵyzstan prezıdenti Sadyr Japarov 17 qarashada ótetin jergilikti keńes depýtattarynyń saılaýyna baılanysty halyqqa úndeý joldady.

Sadyr Japarov halyqty jergilikti keńes depýtattaryn saılaýǵa belsendi qatysýǵa shaqyrdy.

– Kez kelgen saılaý, meıli ol jergilikti keńesterge bolsyn, meıli Jogorký Keneshke bolsyn, elimizdiń, halqymyzdyń aldaǵy bes jyldaǵy taǵdyryna tikeleı áser etedi. Siz tańdaǵan ókilder osy kezeńde óńir turǵyndarynyń ómirin jaqsartýǵa jáne eldiń damýyna jaýapty bolady. Ár óńirde óz ul-qyzdaryńyzdyń – úmitkerlerdiń qabiletin jaqsy bilesizder. «Tómenge qaraı tartatyndardy» tańdamańyzdar, laıyqtylardy tańdańyzdar. Ol dúnıe tez ózgerip jatqan qazirgi ýaqytta kún saıyn, keıde tipti saǵat saıyn damý úshin mańyzdy, - dedi ol.

Qyrǵyz basshysy bıliktiń saılaý naýqanyna aralaspaıtynyn basa aıtty.

– Bıliktiń saılaýǵa, basqa da máselelerge aralasyp, bir kandıdatty alǵa tartyp, ekinshisin qabyldamaı tastaǵan kezi – ótkenniń enshisinde. Kez kelgen memlekettik qyzmetkerdiń saılaýǵa aralasyp, belgili bir kandıdatty alǵa jyljytqany anyqtalsa, ol qatań jazalanady, - dep eskertti Qyrǵyz Respýblıkasynyń prezıdenti.

Sadyr Japarov saılaý ár bes jyl saıyn ótetinin, jumsalǵan jarty saǵat oblys pen qalanyń osy kezeńdegi taǵdyryn aıqyndaıtynyn eske saldy.

– Saılaýǵa qatysý – ózgeristerge jasalǵan qadam. Ózgeristerdi ózimizden bastaıyq, - dedi Qyrǵyzstan basshysy.

2024 jyldyń 17 qarashasynda Qyrǵyzstanda jergilikti keńester, sondaı-aq Bishkek jáne Osh qalalary depýtattarynyń saılaýy ótetini buǵan deıin habarlanǵan bolatyn.

Ortalyq saılaý komıssııasynyń málimetinshe, 39 saıası partııa 33 qalalyq keńes depýtattyǵyna 188 kandıdat tizimin usynǵan. Qyrǵyz Respýblıkasy Ulttyq qaýipsizdik memlekettik komıtetiniń basshysy Kamchybek Tashıev jergilikti keńester depýtattyǵyna úmitkerlerdiń árqaısysynyń qylmys pen sybaılas jemqorlyqqa qatysy bar-joǵyn jan-jaqty tekserýdi tapsyrdy.