Qyrǵyzstanda jemqorlardyń týystaryna memqyzmette jumys isteýge tyıym salynady

BІShKEK. KAZINFORM — Qyrǵyzstanda endi jemqor sheneýnikterdiń jaqyn týystaryna memlekettik qyzmette jumys isteýge tyıym salynady. Bul týraly eldiń Ulttyq qaýipsizdik memlekettik komıtetiniń basshysy Qamshybek Tashıev málimdedi. 

Ulttyq qaýipsizdik memlekettik komıtetiniń tóraǵasy eldegi sybaılas jemqorlyq deńgeıi tómendegenimen, memlekettik organdarda bul másele áli de bar ekenin habarlady.

Sybaılas jemqorlyq qylmysy úshin qamaýǵa alynǵan keıbir tulǵalardyń keıde merziminen buryn bostandyqqa shyǵatynyn, munyń quqyq qorǵaý organdaryn ábden sharshatqanyn aıtty.

— Biz jemqorlardy ustaımyz, biraq olar qaıta bosatylady. Shynyn aıtsaq, onsyz da bul kúresten sharshadyq, — deıdi ol.

Bul jaǵdaıǵa baılanysty Ulttyq qaýipsizdik memlekettik komıteti zań jobasyn ázirlegeni atap ótildi.

Oǵan sáıkes, jemqorlyqpen aınalysqan sheneýnikterge ómir boıyna memlekettik organdarda jumys isteýge tyıym salynady.

— Jemqorlar aıyppuldardan qutylǵan soń 1-2 jyldan keıin memlekettik qyzmetke qaıta oralyp, zańǵa qaıshy áreketterin jalǵastyra beredi. Alaıda, qazir aıyppuldyń ornyna naqty túrme jazasy qoldanylýda, — deıdi Qamshybek Tashıev.

Sondaı-aq, jemqorlyqqa jol bergenderdiń týystary, onyń ishinde balalary men baýyrlary memlekettik qyzmetke qabyldanbaýy kerektigin jetkizdi.

— Áıtpese, jemqorlyq órship kete beredi. Budan bylaı birde-bir jemqor sheneýnik túrmeden qashyp qutyla almaıdy, olarda shartty túrde merziminen buryn bosap shyǵý quqyǵy joq. Sybaılas jemqorlyq — memlekettiń nómiri birinshi jaýy, — dedi Ulttyq qaýipsizdik memlekettik komıtetiniń tóraǵasy.

Aıta keteıik, buǵan deıin Qyrǵyzstanda sybaılas jemqorlyq úshin jazany qataıtýdy usynyp jatqanyn jazǵan edik.