Qyrǵyzstanda jaıylymdy búldirgenderdiń kóligin alyp qoıý usynyldy
ASTANA. KAZINFORM – Qyrǵyzstan prezıdenti Sadyr Japarov el turǵyndaryn tabıǵatty aıalaýǵa shaqyryp, taý bókterleri men jaıylymdardy kvadrotsıkl, jol talǵamaıtyn kóliktermen búldirgenderge jazany qataıtýdy usyndy.
Qyrǵyz kóshbasshysynyń aıtýynsha, elde taýly aımaqtarda kvadrotsıkldermen júrý jaǵdaılary jıilep beredi. Olar kólikterimen kók shóp pen jasyl jaılaýdy búldirip júr.
- Adamdar kvadrotsıklder jáne jol talǵamaıtyn kólikterimen tipti jaıylymǵa da kirip ketedi. Taýly aımaqta da joldardyń bar ekenine qaramastan olar jasyl alqapty qurtyp, jaıylymdardy taptap júr. Osyǵan baılanysty men ishki ister jáne tabıǵı resýrstar, ekologııa men tehnıkalyq baqylaý mınıstrlikterine osyndaı zańbuzýshylarǵa aıyppul salý jáne olardyń tehnıkalaryn alyp qoıý múmkindigin qarastyrýdy tapsyrdym, - dep jazdy ol.
Ol taýǵa saıahattaýshylardy kólikterimen tek jolmen júrýge, jol bitken jerde jaıaý júrýge nemese kólikti qaldyryp atqa minýge shaqyrdy.
Osyǵan deıin Qyrǵyzstan bıligi el azamattaryn elektr energııasyn únemdeýge shaqyrǵan bolatyn.