Qyrǵyzstanda jasyryn bosanýǵa ruqsat berilmekshi

ASTANA. KAZINFORM —  El parlamentinde jasyryn bosanýdy zańdastyratyn zańnamaǵa túzetýler engizildi, dep habarlaıdy Kazinform tilshisi.

Қырғызстанда жасырын босануға рұқсат берілмекші
Фото: freepik

Tıisti zań jobasy qoǵamdyq talqylaýǵa shyǵaryldy.

Qoldanystaǵy zańnamanyń tetikteri qıyn ómirlik jaǵdaıǵa tap bolǵan, bala tárbıelegisi kelmeıtin nemese tárbıeleı almaıtyn júkti áıelder úshin tıimdi emes ekeni atap ótildi.

– Qyrǵyz Respýblıkasynyń zańnamasy júkti áıelder perzenthanaǵa bosanýǵa barǵanda jeke basynyń derekterin kórsetýdi talap etedi. Aty-jónin jasyrǵysy keletin keıbir áıelder densaýlyq saqtaý uıymdarynan tys jerde bosanyp, óz densaýlyǵy men balanyń ómirine aıtarlyqtaı qaýip tóndiredi, – dep túsindiredi bastamashy.

Zań jobasyna «jasyryn bosaný» atty jańa termın engizildi. Bolashaqta júkti áıelder memlekettik medıtsınalyq uıymdardarǵa baryp, qujat kórsetpeı-aq kómekke júgine alady. Ana men balanyń densaýlyǵyna qaýip tónbeýi úshin, bala qaýipsiz ortada dúnıege kelýi úshin medıtsınalyq ortalyq anonımdik jáne qupııalylyq sharttarda búrkenshik at pen kodtyq sózdi bere otyryp, derbes derekterdi sáıkestendiretin bolady. 

Statıstıkalyq málimetterge sáıkes, 2020 jyl men 2025 jyldyń aqpan aıy aralyǵynda jańa týǵan náresteni tastap ketý boıynsha aqparattyq jýrnalǵa 101 qylmys tirkelgen.

Onyń ishinde:

  • ananyń baladan bas tartýy nemese bosanǵannan keıin perzenthanadan qashyp ketý jaǵdaıy – 6;
  • tastandy bala – 76;
  • óli kúıinde tabylǵan sábılerdiń múrdesi (saıabaqqa qaldyrý, qoqysqa tastaý, qoqys jáshigine salyp ketý) – 19.

Jasyryn bosanýǵa ruqsat beretin ınstıtýt qurý arqyly bala men ana ómirin, densaýlyǵyn saqtaý kózdeledi. Sábıdiń qaýipsiz ortada dúnıege kelýine jaǵdaı jasalmaq. Aty-jónin jarııa qylǵysy kelmeıtin ana úshin derbes deregin jasyra otyryp, qajetti medıtsınalyq kómek alýyna múmkindik berý qarastyrylǵan.

Eske sala keteıik, buǵan deıin Qyrǵyzstan memlekettik tirkeýsiz dinı nekege tyıym salmaqshy ekenin jazǵan bolatynbyz.

Сейчас читают