Qyrǵyzstanda jasyryn bosaný mekemelerin qurý usynyldy

Qyrǵyzstanda jasyryn bosaný úshin zańdy túrde arnaıy bólimsheler qurý usynyldy. Keıbir zańnamalyq aktilerge ózgerister men tolyqtyrýlar engizýdi kózdeıtin tıisti zań jobasy jalpyhalyqtyq talqylaýǵa shyǵaryldy, dep habarlaıdy Kazinform tilshisi.

Usynystyń bastamashysy, parlament depýtaty Jyldyz Sadyrbaevanyń aıtýynsha, zań jobasyn ázirleýdiń maqsaty – bala men ananyń ómiri men densaýlyǵyn saqtaı otyryp, densaýlyq saqtaý júıesin jańǵyrtý.

Sonymen qatar, aýrýhanadan tys qaýipti bosaný sanyn azaıtýǵa jáne jańa týǵan nárestesin beıtanys adamdarǵa tastap ketetin analarǵa balama usynys jasaýǵa múmkindik beredi.

Jasyryn bosaný kezinde ananyń arnaıy mekemede bosaný múmkindigi bar jáne óziniń jeke basyn, aty-jónin úshinshi tulǵalardan, onyń ishinde bosaný protsesine qatysatyn medıtsına qyzmetkerlerinen jasyra alady.

Depýtat balany tastap ketken jaǵdaıda qupııalylyqqa kepildik beretin mamandandyrylǵan bólimshe birqatar máseleniń aldyn alýdyń tıimdi quraly bolatynyn atap ótti.

Atap aıtqanda, áleýmettik jetimdik. Mamandandyrylǵan bólimshe balany tastap ketýge sheshim qabyldaǵan áıelderge baladan bas tartýdyń aldyn alý boıynsha mamandardyń tikeleı qoljetimdiligin qamtamasyz etedi.

Der kezindegi kásibı kómek pen qamqorlyq áıeldiń balasynan bas tartý sheshimine túbegeıli áser etip, bul áreketke jol bermeıdi. Al jańa týǵan balasyn áleýmettik qyzmetter men qoǵamdyq uıymdar arqyly tárbıeleýge bel býǵan áıelge bosanǵannan keıingi qoldaý bir kezderi baladan bas tartý týraly oılanýǵa túrtki bolǵan qıyndyqtardy jeńýge múmkindik beredi. Úılerde, jertólelerde, garajdarda, antısanıtarııalyq jaǵdaıda ana men sábıdiń ólimine nemese aýrýyna ákep soqtyratyn qaýipti bosaný máselesi de sheshiledi.