Qyrǵyzstanda jasandy ıntellekt bolashaq júrgizýshiden emtıhan qabyldaıdy

ASTANA. KAZINFORM — Elde júrgizýshi kýáligi alý emtıhandary endi kúrdelene túsedi, dep habarlaıdy Kabar.

Qyrǵyz Respýblıkasynda Kólik quraldary men júrgizýshilerdi tirkeý memlekettik ortalyǵynyń («Ýnaa») ǵımaraty Prezıdent is basqarmasyna berildi.

QR Prezıdent is basqarmasynyń meńgerýshisi Kanybek Týmanbaev «Kabar» agenttigine bergen suhbatynda, bul sheshimnen keıin Prezıdent Sadyr Japarov jınalys ótkizip, kásiporynnyń jumys jaǵdaılaryn jaqsartý boıynsha tapsyrmalar bergenin aıtty.

— Qazirgi «Ýnaa» ornalasqan ǵımarat talap etiletin standarttarǵa saı emes jáne jalǵa alynǵan. Osyǵan baılanysty memlekettik jer ýchaskesin jyldam berý, jobalaý jasap, tolyq jaǵdaımen zamanaýı ǵımarat salý týraly sheshim qabyldandy. Búgin qurylysqa arnalǵan kapsýla qoıyldy, — dedi ol.

Meńgerýshiniń aıtýynsha, jańa ortalyq barlyq qajetti jaǵdaılarmen qamtamasyz etiledi. Emtıhan tapsyrý protsesi yńǵaıly ári ashyq bolady, al azamattar úshin eń bastysy — qolaıly jaǵdaı jasalady.

— Emtıhandar endi kúrdelene túsedi. Jaqyn arada baǵdarlama 20 qarashaǵa deıin usynylady. Teorııalyq kýrs 384 saǵatqa deıin ulǵaıady, praktıkalyq daıyndyq ártúrli aýa raıy jaǵdaıynda ótedi — qysta muzda, jańbyrly kúni jáne aptap ystyqta. Sol kezde ǵana júrgizýshi kýáligin alýǵa bolady. Emtıhan suraqtaryna kelsek, qazir 2021 jyly qabyldanǵan 700 suraq qoldanylady. Biraq biz 2 000–3 000 jańa suraq engizemiz. Emtıhan alýshylar bolmaıdy, baǵalaýdy jasandy ıntellekt júrgizedi. Búkil júıe tolyq tsıfrlyq túrde bolady, — dep atap ótti Týmanbaev.

Budan buryn Qyrǵyz Respýblıkasy Ulttyq banki tóraǵasy Melıs Týrgýnbaev onlaın tólemderdiń ósýi týraly pikir bildirgenin jazǵan edik.