Qyrǵyzstanda jappaı tártipsizdik uıymdastyrýǵa daıyndalyp jatqan top ustaldy
ASTANA.KAZINFORM - Qyrǵyzstannyń quqyq qorǵaý organdary elde zańsyz narazylyq aktsııalaryn ótkizýdi kózdegen burynǵy saıasatkerler, uıymdasqan qylmystyq top músheleri men azamattyq belsendilerden turatyn qylmystyq topty anyqtady, dep habarlaıdy Kazinform tilshisi.
Shý oblysy ishki ister bas basqarmasynyń málimetinshe, Qyrǵyzstan Respýblıkasy Qylmystyq kodeksiniń 278-baby «Jappaı tártipsizdik» boıynsha qylmystyq is qozǵaldy.
Arnaıy is-shara barysynda atalǵan toptyń belsendi múshesi, Jalal-Abad oblysy, Toqtoǵul aýdanynyń turǵyny 1978 jyly týǵan azamat S.F. ustalǵan kezde qylmystyń izin joıýǵa árekettengen.
Azamat M.O. da ustaldy. 1998 jyly týǵan, Osh oblysy Qara-Sýý aýdanynyń týmasy. Ol arqyly qarajat zańdastyrý boıynsha bank operatsııalary júrgizilgen. Anyqtalǵandaı, kúdikti belsendi Tilekmat Kúrenovtiń jáne basqa da belsendi tulǵalardyń qatysýymen arandatýshy sıpattaǵy vıdeomaterıaldar daıyndap, áleýmettik jelilerdegi feık akkaýnttar arqyly taratqan.
Polıtsııa Jalal-Abad, Osh oblysy men Osh qalasynda tintý júrgizip, zattaı aıǵaqtar tárkiledi.
Jappaı narazylyq aktsııalaryn daıyndaýǵa jáne uıymdastyrýǵa qatysy bar degen kúdiktiler ýaqytsha ustaý ızolıatoryna qamaldy.
Buǵan deıin elde memlekettik tóńkeris jasaý áreketiniń joly kesilgeni habarlanǵan bolatyn. 2024 jyldyń qarasha aıynda jergilikti keńesterge saılaý kúni jappaı tártipsizdikter jasap, qoǵamdyq-saıası jaǵdaıdy turaqsyzdandyrýǵa daıyndalǵan toptyń ustalǵany týraly da jazǵanbyz.